New Delhi, Risaw 17 : Ka ïing Bishar ba ha khlieh duh ka Ri India- ka Supreme Court ka la pynmih ïa ka hukum kaba ong ba ym lah satia ban ai jingithuh da ka aiñ ïa ka jingïashongkha para kynthei ne para shynrang (same sex marriage) haba kyntait ruh ban ai ïa kajuh ka hok ïashongkha ïa ki LGBTQIA+ hapoh ka Ri.
U Chied Justice ka India (CJI) u DY Chandrachud ula ong ba ka jingthaw ïa kane ka Aiñ ka shong eh ha ka bor jong ka ïing Dorbar Parliament.
Ka ïing Bishar ba san ngut ki Nongbishar ba la khlieh da u CJI D.Y Chandrachud haba shong bishar ïa kane ka mukotduma kaba la ïaid naduh u bnai Iaiong bad Jymmang mynta u snem, ka la pynmih ïa ka hukum hynne ka sngi Ba-ar.
U CJI ula ong ba ka don ka bynta ba “mynjur bad bym mynjur ba haduh katno ngi lah ban ïaid” halor ka jingïashongkha para kynthei ne para shynrang haba pule ïa ka hukum.
Arngut na ki saw ngut ki Nongbishar ki la mynjur bad ka CJI ba ka ïing Bishar kam lah ban ai jingithuh kat kum ka aiñ ïa ka jingïa shongkha para shynrang ne para kynthei.
Kane ka hukum ka ïing Bishar ka la mih san snem hadien ka hukum u snem 2018 ba ka ïing Bishar ka la pynduh noh ïa jingkhang ïa ka gay sex jong ka por synshar ka ri Bilat.
Lah ban kdew hangne ba tang ka Taiwan bad ka Nepal kaba shah ïa ka jingïashongkha para kynthei ne Shynrang ha dewbah Asia.
Ka Sorkar u Myntri Rangbah Duh ka Ri Narendra Modi, ka la pyrshah ïa ka jingmudui mukotduma bad ong ba dei ka ïing Dorbar Parliament, ka rynsan ban ïatai bad thaw aiñ halor kane ka kam.
Kala ong ruh ba kum kane ka jingïashongkha kam ïahap satia bad ka jingmut jingpyrkhat jongki Longïing ka India halor u Lok, ka kurim bad ki Khun.
