Shillong, Risaw 17 : Ka Meghalaya People’s Labour Union (MPLU) ha ka sngi Ba-ar ka la ujor sha u CEM ka KHADC, Bah Pynïaid Sing Syiem bad dawa ba u dei ban tuklar mardor halor ka jingïoh kamai sahuh ki bar jylla khlem da pynbiang ïa ki kot ki sla kum ka Labour bad Trading Licence.
Ha ka dorkhas ba ka seng ka phah sha u CEM, ka MPLU ka la kkynnoh ba ki don bun bha ki bar jylla kiba la pynïaid ia ka khaii pateng ne ka kamai kajih jong ki kum ha Byrnihat, 13mer bad ruh ha Raid Marwet ha Ri Bhoi khlem da pynbiang ïa ka Labour bad Trading Licence.
Ka Union ka la pyntip ruh ïa u CEM ba ki don bun ki bar jylla kiba khlem don ïa ki kot ki sla kiba biang kiba treikam ruh ha ki thain Shallang bad ha ki karkhana Coke ha Borsora, Cherragaon jong ka West Khasi Hills bad Ichamati, Kalibari bad ha Majai kaba hap ha East Khasi Hills.
Halor kane ka phang, ka Union ka la pynpaw ruh ïa ka jingkloi jong ka ban ïa treilang bad ka District Council ban leit khynra ïa kitei ki jaka khaii kiba treikam khlem da pynbiang ïa ki kot ki sla ba donkam kum ka Labour bad Trading Licence.
