Shillong, Risaw 17: Ka tnat ri Dohkha ka sorkar jylla mynta ka sngi ka la pynlong ïa ka tamasa die Dohkha lane ka 7th Aqua Fest 2023 ha phyllaw jong ka State Central Library.
ïa kane ka tamasa die Dohkha la pynlong na ka bynta ban pynsngewthuh paidbah ïa ki lad jingmyntoi kiba mih na ka kam ri Dohkha kiba la wan lyngba ki skhim sorkar jylla bad sorkar pdeng.
Ha kane ka sngi la ïohi ruh ki jingpyninam bad die ïa ki jait Dohkha na kylleng sawdong ka jylla kiba ki paidbah ki la ri lyngba ka jingïarap ka tnat ri Dohkha.
Ki nongri Dohkha kila pynpaw ka jingai khublei ïa ka tnat ri Dohkha ka sorkar jylla lyngba ka project Blue Revolution.
Haba kren ha kane ka sngi u Myntri ka tnat kam ri Dohkha u bah A.L Hek ula ong ba kane ka long ka sngi kaba kmen namar u kynmaw ïa ka ïing ka sem lajong kaba la im ja kpoh da ka die Dohkha ha Shillong.
U bah Hek ula ong ba ka kam ri Dohkha ka long kaba kyrkhu bha namar kane ka kam ym tang ba ka kyntiew ïa ka ïoh ka kot ha ïing ha sem hynrei ka aikam ruh ïa kiwei ki paidbah ha ka ban ri ne die Dohkha.
Ula ong ba ka tnat ka don jingthmu ban nang pynheh bad nang pynbun shuh shuh ïa ka kam ri Dohkha ban nang plie ka lad ïoh kam ïoh jam ïa ki paidbah ka jylla.
“Nalor ka Blue Revolution, ka sorkar jylla lyngba ka Meghalaya Mission Scheme ka tnat kan ïarap pisa ïa ki paidbah ban sengkam lajong haka kam ri Dohkha ban pynlah ïa ka jylla ban pynmih kham bun ïa ki Dohkha na ka bynta ban pyndap pynbiang ïa ka jingdonkam” la ong u bah Hek.
U bah Hek ula kyntu ïa baroh ban ïatreilang ban nang kyntiew shuh shuh ïa ka kam ri Dohkha na ka bynta ban kyntiew ïa ka ïoh ka kot jong ka jylla.
