Shillong, Risaw 17: Ka Seng Samla Balang Catholic Mawkynrew kala pynbna ban pynlong ïaka tamasa bam sohphlang ha ka 21 tarik mynta u bnai, kaban kylla long ruh ka tamasa kaba nyngkong eh ban pynlong ha ka jylla.
Na ka liang u President ka Seng Samla, Samla Pynbianglang Kshiar u la pyntip ba ïa kane ka tamasa bam sohphlang yn pynlong hapoh ka Holy Cross School Mawkynrew bad ka thong jong kane ka tamasa kadei ban kyntiew ïa u Sohplang u ba dei ruh u jingbam tynrai jong ki paidbah ka thain Rilum Khasi-Jaintia.
Utei u samla u la ïathuh ruh ba kane kan dei ka sieng kaba nyngkong ba yn pynlong ïa kum katei ka tamasa ban kyntiew ïa u sohphlang kaba long ruh ha kajuh ka por ban pynshlur ïa ki nongrep sohphlang ban rep kham bun ïa utei u kynja soh ba pawnam bha ha ka por tlang. “Ïa kane ka tamasa bam sohphlang yn bei tyngka daka tnat Tourism ka sorkar jylla haka jingïatreilang bad ka tnat ka rep ka riang bad ka Meghalaya Age,” la ong u bah Pynbiang.
Hadien kane, u la ïathuh ba kum ka seng kin pyni nam ruh ïa kiwei ki mar rep kum u soh strawberry, u krai bad kiwei kiwei ki jingbam tynrai ba pynmih da ki nongrep bad ki paidbah na ka thain Mawkynrew.
