Shillong, Ïaïong 14: Ïa ka phlim “Lanot” yn sa pyllait paidbah nohshen ha Bijou Cinema, Shillong ka phlim ba la shim bynta da u Bah Monstar Nongdhar kum u tyngshop bad ka Lucy Diengdoh kum ka Puron.
U bah Monstar Nongdhar u ba long u tyngshop lamkhmat jong ka phlim “Lanot” uba long u trai ka phlim u la pyllait paidbah ïa ka teaser ha ka sngi Nyngkong ha Shillong Press Club.
Ha kane ka sngi pyllait paidbah ïa kane ka teaser phlim “Lanot” la ïadonlang ki tyngshop ki puron bad kiwei kiwei .
Ha ka jingïakren sha ki nongthoh khubor u Bah Monstar Nongdhar ula ïathuh, ba ïa kane ka phlim la sdang ban ringdur naduh u snem 2019 hynrei namar ka jingwan u Covid-19 ka la pynthud ïa ka jingringdur bad ka kam ka la sdang sahteng noh.
U la ïathuh ruh, ka khana jong kane ka phlim “Lanot” la pynwandur halor ka jingjia ba sngewsih ïa kawei ka longïing. Ïa ka jingïathuh khana jong kane ka phlim, ba don kawei ka longïing kaba duk ha kaba u kpa jong ka ïing u shu bylla sngi ha ka par dewïong bad uwei u nongkhaïi Dewïong.
U la ïathuh ba ïa kane ka phlim palat 10 lakh la pynlut ha ka ban pyn-i-tynnat bad u la ong ba ka long ka phlim ka ba itynnad shikatdei eh, ba ki nongshim bynta ha kane ka phlim ruh ki dei kiba la tbit bha ha ka kam ak phlim.
Shuh shuh u la ong, ki paitbah ki la ju ïohi ïa u ha ki phlim Khasi lyngba ka Youtube bad ha Hello Meghalaya ba u ak sniew ne ak kum u gang, katba ha kane ka Phlim “Lanot” u Bah Monstar Nongdhar u la shim bynta kum u main actor.
Kumta u Bah Monstar Nongdhar u la kyrpad ïa ki paitbah ka bri u hynñiewtrep hynñiewskum ban leit ai jingkyrshan ïa ka phlim “Lanot” ynda la pynlait ïa ka ha Bijou cinema.
