Shillong, Nailar: Lah da ka phew snem ba ka Leo Advertising na Guwahati kawei na ka kompeni bapaw ha kane ka thain shatei lam mihngi ka la shakri sha ki paidbah ka jylla Meghalaya bad khamtam ha nongbah Shillong lyngba ki Ïewbah ne ki Expo, mynta u snem ruh kan pynlong ïa kane ka ïewbah ba la tip kum ka 11th International Leo Expo, naduh ka 7 tarik haduh ka 24 tarik October, 2022 ha madan Malki, Shillong.
Ka Leo Expo ka kular ban wanrah sha ki nongshnong jong kane ka nongbah jong ki diengkseh ne Pine City, ïa ka rukom siew rukom pet kaba kham phylla bad kaba pynkmen ïa baroh. Ki riew kyrni ha ka siew ka pet ka nongbah Shillong bad ki marjan kin sakhi da lade ïaka ïew ba jyllei da ki tiar bun jait na ki ri kum ka Egypt, Thailand, Bangladesh bad Afghanistan.
Nalor jong kitei ki national bad ki International brand kane ka expo kan don ruh ïa ki dukan ban die ïa ki tiar kiba la thaw kyrpang na la ka jong ka jylla nongbah Shillong.
Ka phangpdeng jong kane ka 11th International Expo kan long ka jinglong phylla jong ka Thailand Shoping Festival, ha kaba ki nongwan kin ïoh ïa ka kabu ban jied bad thied ïa ki tiar ba phylla kiba na Thailand.
Ha kane ka Ïewbah kin don ruh shibun bah ki tiar kum ki jingdieng, ki tiar shet ba bun jait, ki jingpynriam ïing, ki ashar, ki furniture, ki jaiñ bad ki jingpynbha briew ban shu ñiew kyrteng khyndiat. Ki paidbah ka nongbah Shillong kin ïoh ruh ban mad ïa ki jait jingbam kiba shngiam bad kiba bun jait ha ka por ba ki wan ban siew ban pet.
