Shen yn pynbna ïaka resol DSC, kyrpad u MLA ban thungkam bun da ki trai shnong haka jingïalang bad u DC

Nongpoh, Naitung 15: U MLA ka Nongpoh u Bah Mayral Born Syiem mynta ka sngi u la lum da ka jingïalang bad u Deputy Commissioner ka Ri-Bhoi ba dei ruh u Chairman ka District Selection Committee ban ïakren halor ka jingpynslem ïaka result District Selection Committee ha Ri-Bhoi hadien ba ka eksamin la dep ban pynlong naduh u snem 2020-21.
Ïa katei ka jingïakynduh lang la pynlong ha kamra jong u A Baranwal Deputy Commissioner ka Ri-Bhoi District, haka jingdonlang u Bah Balajied Ranee MDC ka Nongpoh, Raja Brahma Member Secretary, Bah Pull Nongrum Member bad katei ka jingïakren kala long kaba seisoh hadien ba u DC ba dei ruh u Chairman ka DSC u la kular ban shimkhia.
Haba kren sha ki lad pathai khubor hadien ka jingïalang naka liang u Bah Mayral Born Syiem u la pynpaw ba ka daw bala pynlong ïa u ban lum da ka jingïalang bad u DC ryngkat u Member Secretary ka dei hadien ka jingpynslem ïaka result DSC kaba bun naki samla wadkam kila ap khmih lynti mynta la katto katne por.
Na ka liang u MLA u la pynpaw ruh haka jingïaid lynti jong ka eksam thungkam la dep ban pynlong naduh u snem 2020-21 halor ki post bapher bapher kaba dang sahteng haduh mynta namar ba ym pat lah ban pynbna namar bun naki samla ki dang ïai ap haduh mynta nalor ka jingsngewkhia jong ki kmie ki kpa halor ka jingpynslem ïaka resol.
Dei halor katei ka daw ba kum u MLA u la lum ïa katei ka jingïalang ban pynkloi ïaka result Written Test jong ka eksamin DSC, bad ka jingïakren ka long kaba seisoh, namar wat hapdeng ki jingeh bad ki jingbunkam, naka liang u DC ba dei ruh u Chairman ka DSC bad u Member Secretary kila kular ban shimkhia ïa katei ka kam bad la kumno kumno ïa ka resol yn pynbna noh ha u bnai Nailur lane Nailar mynta u snem namar ka daw ka jingslem jong ka resol DSC kadei namar ka jingslem ban pynkhreh ïaka Roster System da ki tnad sorkar bapher bapher.
Na ka liang u MLA u la ioh ruh ban ïakren ha kaba ïadei bad ka jingthungkam dei ban ailad bun da ki trai shnong kiba naka district Ri-Bhoi khlem da kheiñ jaitbynriew, namar kiwei kiwei ki district ki don lakajong ka District Selection Committee bad ruh ban pynkloi ka jingpynbna ïakiwei kiwei ki kam ba dang lait ha Ri-Bhoi namar ki dang don shibun ki kam kiba lait ba dang hap ban pynbna bad dei ban khot noh kham kloi hadien bala dep pynbiang ïaka Roster katkum ka Office Memorandum.