La donkam ban ithuh noh ïa u Muslim kum ki OBC bad ban bhah 5% ha ka ïohkam ïohjam

Shillong, Naitung 15: U MLA ka Rajabala constituency Dr Mizanur Rahman Kazi, ha ka sngi Nyngkong, ula leit aiti ïa ka dorkhas sha ka Expert Committee halor ka Reservation Police bad dawa ban ai jingithuh noh ïa ki Muslim trai shnong ha ki jaka them ka Ri-lum Garo kum ki Other Backward Class (OBC) bad ban ai bhah ba 5%.
Ïa kane ka dorkhas la aiti sha u Justice (Retd) MC Garg, Chairman ka Expert Committee halor ka Reservation Policy ka Jylla.
U Kazi ula kren halor ka histori bad ka jinghiar pateng jong ki Muslim kiba sah ha ki jaka them ka Ri-lum Garo ha ryngkat bad ki tynrai jong ki naduh ka por jong ki Mughal Empire. U la kdew ruh ïa ki riewkhraw bad ki jaka sahnam kum ka lum jingtep u shipai General ki Mughal Mir Jumla hajan Ampati bad u Dargah Sharif ka Hazrat Peer Shah Kamal Baba ha Mahendraganj.
Haba ïakren bad ki lad pathai khubor hadien ba aiti ïa ka dorkhas, u Kazi ula ong, “Nga la ai ïa ki katto katne ki jingai jingmut haba ïadei bad ka jingpynbeit thymmai ïa ka Reservation Policy. Ka jingai bhah ka dei ka kam kaba eh bha. Nga la pyrshang ban batai ïa ka histori jong ki briew ba sah ha ki jaka them ka Ri-lum Garo”.
Haba kylli ïa ki jingai jingmut, u Kazi ula ong, “Ki don artylli ki mat. Kawei ban ithuh noh ïa ki jaitbynriew Muslim kum ki OBC haba khmih ïa ka rukom im bad ka ïoh ka kot jong ki. Kaba ar, nga la kyrpad ban ai bhah ba 5 % ïa ki”.
Haba kren ïa ka jingsam bhah hapdeng ki Khasi-Jaiñtia bad Garo, u Kazi ula ong, “Kaei ka bhah kaba ki hynmen ki para Khasi, Jaiñtia bad Garo ki ïoh, nga khlem ktah ïa kane. Ka jingkyrpad jong nga ka long ban ai 5% na ka General quota,” ula ong.