Shillong, Naitung 15: Ka seng Hynñiewtrep Youth Council (HYC) ha ka sngi nyngkong ka la leit pan jingpynshai na ka Medical Superintendent (MS) ka Ganesh Das Hospital (GDH) halor ka jingoh dor ban sumar ïa ki khyllung hapoh ka Neo Natal Intensive Care Unit.
Ïa kane ka jingbuh dor la pynmih ha ka 5 tarik Naitung 2024, da ka Internal Management Committee kaba dei peit bad pynïaid ïa kane ka Hospital ha ka Building thymmai ba don ka Neo Natal Intensive Care Unit. Haba kren sha ki lad pathai khubor, u President ka HYC u Bah Roykupar Synrem, ula ïathuh ba ka seng ka la ïoh jingujor na ki paidbah haba ïadei bad ka jingbuh dor ban sumar ïa ki khunlung khamtam ïa kiba dang shu kha.
U Bah Roykupar ula ïathuh ba kane ka jingpynmih ïa ka jingoh dor thymmai ka kot haduh T.1500 shi mied na ka bynta ban buh ïa ki khylung ba dang kha ha ki Ventilator, ban ai Oxygen, u Centralline ban pyndait bad ai dawa bad kiwei kiwei.
