Shillong, Naitung 15: Ka khubor ba la ïoh la ïathuh ba ka thaiñ Umïam hajan jong ka jingkieng Pulit, kaba don ruh ïa ka jaka ïaid kai ki nongshangkai pyrthei, ka la kup mynta ïa ka dur kaba sniew bad kaba isaitmet ban peit namar ka jingsatah jong ki jaboh jabaiñ bad ki ñiut ki ñier naduh ba ki bor Sorkar ki la pynlong ïa ka surok service road, kum ka jaka pynïeng ki bos Night Super mynta la saw-san bnai.
Lah ban ong ba kane ka jingpynïeng bos Night Super ha kane ka surok, ka la sdang naduh ba ka jylla ka la tei pynkhlaiñ bad maramot ïa ka Damsite bad ka jingkieng Damsite-kaba la khang ïa baroh ki kali heh ba kin ïaid lyngba ka jingkieng kat haduh mynta mynne.
Ki bos Night Super kiba wan na ki thain Silchar, Assam kila hap ban pynhiar ia ki passenger hapoh ka Inter State Bus Terminal (ISBT), Mawiong katba kiba wan na Guwahati ki hap ban pynhiar ha ka Service Road ba don ha Jingkieng Pulit, Umiam.
Ka jingleh matlah jong ki bor Sorkar ban shimkhia ïa ka khuid ka suba da kaba pynbiang ïa ki jaka leit bar bad ki jaka bret ñiut ha kane ka service road, ka la pynlong ïa kane ka jaka kaba la ijli bad ba sma iwtung namar ka jingsatah ki jaboh jabaiñ, ki paiñkhana bad ki jingleit bar jong ki nongñiah bos bad kumjuh ruh jong ki paid nongleit nongwan ki bym don jaka ban phai shano shano ruh.
“Naduh ba phah pynïeng bos ha kane ka jaka ha Umïam, ki nongleit jingleit kynthup naduh ki nongñiah bos bad ki nongbud kila mad jingeh bha na ka jingbym don ka jaka leit bar. Dei kane kaba pynbor ïa kine ki briew ba kin leit bar pathar kylleng ki jaka ba ki sngew shngaiñ bad bret ruh ïa ki jaboh jabaiñ kat haba lap ba shem,” ïathuh ki katto katne ki nongñiah bos bad ki paidbah nongleit nongwan haba kren sha ki lad pathai khubor hynrei ki bym kwah ban pynpaw kyrteng.
U Rangbah Shnong ka Umïam bad u Rangbah Dong ba kynthup ïa u Bah Stevenson Kharkrang bad Bah Sidra Basaïawmoit, kila pyntip ba ka Dorbar Shnong na ka por sha ka por ka la ïai pynsngew sha ki bor khmih ïa ka jingdonkam ban buh ïa ki jaka leit bar bad ki jaka bret ñiut hynrei ym shym la don satia mano mano ruh ba pynsngap haduh kine ki sngi.
“Ka Dorbar Shnong bad ka Tnad Tourism kila shimkhia shipor ban buh ïa ki jaka leit bar paidbah kaba ki ong ka Removable Toilets ha kylleng ki jaka jngai jngai jong ka pung Umïam, hynrei namar ka jingïatakhuh bad ki kyndon aiñ ka ïingkashari Meghalaya High Court, ka Shnong ka la hap ban weng noh,” ki la ïathuh.
Ki la ïathuh ba dang shen ka Tnad Tourism bad ka Bor District ka Ri-Bhoi, kila dep ban sorjamin ïa kawei pa kawei ka jaka ban shna ïa ka jaka leit bar bad jaka bret ñiut kaba thikna ha ka thaiñ Umïam.
Halor ka jinglong jingman ha Jingkieng Pulit, ka Dorbar Shnong ka kyrpad ïa ki bor khmih ban shimkhia ha ka ban leh eiei noh mardor khnang ban lah ban wanrah ïa ka jingkhuid jingsuba ha ka thaiñ bad ki jaka rud nong jong ka pung Umïam.
