Shillong, Nailar 29: U Symbud Myntri Rangbah ba khmih ïa ka tnat District Council Affairs (DCA) u Bah Prestone Tynsong ha ka sngi baar u la ong ba ka sorkar kan sa phah shen ïa baroh artylli ki kyndon ba la pynthymmai ne ki amendment rule ba la mynjur da ka KHADC bad JHADC na ka bynta ka jingpynbiang ïa ki constituency bapher bapher sha u Lat ka jylla.
“Baroh artylli ki district council ki la dep ban mynjur ïa ki amendment rule. Kumta ngi dang pynkhreh ban phah noh sha u Lat ka jylla,” ong u Bah Tynsong sha ki lad pathai khubor.
“Shisien ba la mynjur da u Lat kumta ngin sa pynbna noh ïa ka,” u la bynrap.
Ka sorkar jylla ka lah ban pynjlan ïa ka samoi treikam jong ka Khasi Hills Autonomous District Council (KHADC) bad Jaiñtia Hills Autonomous District Council (JHADC) sa kumba 6 bnai.
Kane ka jingpynjlan ïa ka samoi treikam jong baroh artylli ki ADC kan kut noh ha ka 5 tarik u Nailur.
Na ka liang ka kynhun Myntri kan sa shong biang ka jingïalang ha shwa ba kane ka jingpynjlan ïa ka samoi treikam kaba 6 bnai kan kut noh.
