Ha ka juk ïa beh ïa ka jingstad pyrthei khlem da kynmaw shuh ban tyngkai ïa laka tynrai ka buh ïa ka Jaidbynriew rit paid jong ngi ha tmier jong ka riat, ka jingma kaba lah ban jah duh syndon noh ïa ka nongtynrai jong ka ktien bad ka riam u Khun Khasi Khara ne u Khun Hynniewtrep jong kane ka ri ba ieid ki Blei. Ka jingjyndong jingmut jong ki katto katne lehse kadei kawei pat ka dawbah kaba pynlong ïa kane ka jaidbynriew rit paid jong ngi ban ïa pyrthuh noh ïa ki rongphong ba thaba na ri sepngi bad klet jynduh syndon noh ïa la ka jong. Imat ka kyntien ki riew hyndai, ‘sarong ïa la ka jong’ ka lah ban duhjait noh syndon na kane ka ri baieid jong ngi lymda don ki khraw pyrkhat ki kynrem ki lyndan, ki riewshemphang ban khring bad khlong biang.
Ka jingma kaba lah ban buh ïa ka jaidbynriew kadei eh namar ka jingnang ring sdot jong ka Ktien Tynrai ïa kaba la suit la shor bad pynjanai da ki longshwa manshwa. Ka jingbeh rong jong ki khun samla ka ri ïa ka rongphong ba shisngi bad leh khnang syndon ban klet noh ïa ka ktien tynrai ka la nang pyni tad dor shuh shuh hakhmat ka pyrthei, ïa kane la sakhi ha ïew ha hat, ha ki lynti syngkien, bad wat tang ha tyngkong iing ruh. Ka ktien KHUBLEI imat ka la jah noh ha ki katto katne ki bynta jong ka jylla lait noh ha ki nongkyndong. Ha ka jaka jong katei ka kyntien kaba kit jingmut kaba don lang bad ka kyrkhu kyrdoh ïa kito kiba ngi kwah ban kren khana ne kito kiba ngi ïa kynduh teng khat eh la bujli jubor noh da ka kyntien ‘nongwei’ bad bun kiwei kiwei pat. Kaba kham ipohdor bad kaba u nongwei u ïoh ban rkhie pashait ïa ki khun samla sarong jong ngi kiba sngew tynnad ban kren ïa ka ktien nongwei ha la shnong ha la u pud u sam bad ha la ka jong ka khyndew ka shyiap kadei eh ha kim kynmaw shuh ban kren da ka kyntien lajong haba ki ïa kynduh para Khasi.
Shaei sha kito ki kyntien tymmen ne ki Jingsneng Tymmen kiba ju long ki kyntien kdew bad ktien sneng ïa ki lawei ka Jaidbynriew. Ka jingwan jong kita ki skul English Medium ruh imat i kumba ki la kahdum noh ïa ki heprit kiba dang khie wat ban spel dak ïa ki kyntien Khasi. Haoid kam dei kaba sniew ban beh ïa ka jingstad hynrei kadei pat ha kajuh ka por ban pynneh bad tyngkai pat ïa la ka jong ba ïoh lehse tang na ka daw ka jingkhein sting bad ka jingbym patiaw jong une ka dkhot naman la ka iing ka lah ban poi syndon sha u pud ba ka ktien Khasi baieid jong ngi ka lah ban shu per pynban tang ha ki lyoh shisien ka sngi. Lehse, ka shongkha shongman ruh kadei kawei pat ka dawbah jong ka jingshong syier jong ka jaidbynriew. La ïohi sharum shaneng la bun sa tang kita ki khun shipiah ne ki khun kiba mih na ka snam kmie khasi bad kpa khyllahjait ne mar khongpong. Lada kane ka ïai bteng wat ki samla Khasi paka imat ha ki khyndiat snem ban wan kin ym lah lait na katei ka shangkhawiah kaba la pynap shring lypa ha ka kamai kajih bad ha ka leit ka wan jong ki.
Shaei shuh kito ki sengbhalang kiba shu shitrhem shipor kiba la ieng pyrshah ban khanglad ïa ki thei Khasi ban ïoh tnga nongwei, shaei shuh ka jingmana ba tyngeh ïa kiba pynkheiñ ïa kitei ki kyndon. Imat ba la kynjah kitei ki sengbhalang mo baki khun samla kim pynsngew shuh ïa ki kmie ki kpa bad ïaid sahuh ha la ka jong ka mon. Kawei ruh ka jingbym don por shuh ki kmie ki kpa ban sneng ban kraw ïa ka leit ka wan ki khun khamtam ban ïada ïa ka burom ka akor bad ka ktien ka thylliej kadei kawei pat ka dawbah kaba pynlong bun ïa ki khun samla ban ngop ha ki ahor jong ka jyrsieh bah ki jingsngewbha pyrthei.
Kaba hakhmat eh kadei ïa ka bud tynneng ïa ka riam, ki jaiñsem bad ki jaiñkyrshah kim don jaka shuh ha ki iing ki sem bad ha ka jaka jong ki la mih bujli da ki patlun bad kiwei kiwei kiba ki kmie ki kpa hi ki sakhi da la ki jong ki khmat bad sngap man man bad i kumba ki ïa mynjur ïa ka jingleh jong ki. Shaei shuh kita ki jingpynneh ïa ka tynrai haba tang shi troh ki ïa khih shane shatai ban pynneh ïa ka tynrai katba da u paid u ïaleh pyrshah ban pynduh jait syndon ïa ka ktien bad ka riti dustur jong ka jaidbynriew Khasi.
Kaba kham ithamula eh ka long ba da ki hajar bad ki phew hajar ngut ki ju mih ban leit peit khnang sha kito ki tamasa ba ki rang ne ki thei samla ki ju mih ryngkat ka khor ka khriam, hana ba ki kwah ban ïohi ïa kata ka riam tynrai. Hato ka riam Khasi shisien ka sngi kan neh tang ha ki museum ban buh nam bad ba ki pateng kin ïoh ban pule tang ha ki kot shaphang ka rukom riam jong ki mei tymmen pa tymmen jong ki.
Kano kano ka Jaidbynriew kan ym khyllem lymda ki khun jongka hi ki bam kruiñ ne kylla khun jynreiñ ban pynduh pyndam ïa ka riti dustur, ïa ka kolshor bad ka tynrai jong ka kumba la sdang da kiba bun mynta ban pynkhyllem noh jraiñ ïa ka riam bad ïa ka ktien Khasi.
