Shillong, Lber 13: Ka khubor ba la ïoh na ki pulit la ïathuh ba u Sakkar Ali u la phah ka jingujor ba ha ka 8 tarik mynta u bnai ha ka por kumba 12.30 nohphai sngi u la pan ka jingïarap na uwei u briew ban sei ka pisa kumba T. 10,000/- na ka ATM ha Hallidayganj (WGH).
Na ka liang une u briew u la pyndonkam bakla ïa ka ATM card jong u bad hadien u la sei pat ka pisa kaba T. 72,700/- napoh ka bank account jong u.
Ha kawei pat ka jingjia ki pulit ki la ïathuh ba ha ka 10 tarik mynta u bnai ha ka por 8.30 baje mynstep u Sinjang A Sangma u la pyntip ïa u Nokma jong ka shnong Dajugre (WGH) ba ki runar bym lah ban ithuh ki la pynïap ïa u khun jong u uba kyrteng u Dilu R Marak ba la 25 snem ka rta bad u la bret ïa ka met jong u ha kawei ka jaka rep kaba don hapoh ka shnong Dajugre.
Ha kawei pat ka jingjia ki pulit ki la ïathuh ba ka Nomina K Sangma ka la phah ka jingujor ba ha ka 10 tarik mynta u bnai ha ka por 10.30 baje mynstep, ki runar bym lah ban ithuh ki la tuh ïa ka scooter jong ka, kaba don u nombar ML-13A-6822 napoh ka jaka sah jong ka kaba ha Mendipathar PHC (NGH).
