Shah pynphai ki Kali Shipai kiba wan ïaid ha ka jingïakhih ha Khliehriat

Khliehriat, Nailur 25: Ha ka jingïakhih paidbah ba la khot pynlong da ka KSU East Jaiñtia Hills District Unit, mynta ka sngi ha Khliehriat, la lap bad sakhi ba ki kali, wat kito ki kali kiba na bar jylla ruh ki khlem iaid shuh na kane ka surok na Khliehriat, namar ki paidbah ki la shong hapdeng surok national highway.
La lap bad sakhi ba wat ki san tylli ki kali (trok) jong ki shipai Gorkha Rifle, kiba wan naduh Silchar Masimpur, ki kali (trok) jong ki pulit na Mizoram bad kiwei kiwei ki kali kiba wan na bar jylla, khlem da phai ktien wat tang shi kyntien ruh, ki la phai dien noh tang shu poi ha Khliehriat, haba iakren bad ki riew rangbah bad ki dkhot jong ka seng wat ma ki kiba na bar jylla ruh ki sngewthuh ia ka jingeh ha kaba ïadei bad kane ka jingsniew palat ka surok national highway ha East Jaiñtia Hills District.
Haba kren sha ki pathai khubor, u Principal jong ka Jaiñtia Easttern College Khliehriat, u Dr Phervision Nontdu, uba la wan ba ïa shimbynta lang ha akne ka jingiakhih ha Khlierhiat, uba la kleit ruh ban kren ïa ki shipai ba iaid lynti na kane ka surok, u la pynpaw ka jingsngew nguh bad sngew burom ïa kane ka jingsngewthuh lem jong kitei ki shipai ba kane ka jingïakhih ka dei shisha kaba shong nia, kum u nongpyniaid ïa ka shlem ai jinghikai ha college, u la ong ruh ba bunsien ki khynnah ki ju wan poi slem sha college bad kumjuh ruh sha ki skul bad baroh ka daw ka dei namar ka jingjur palat ka jingdheng kali kaba na ka daw ka jing sniew palat ka surok, kane ka jinglong jingman ka surok shisha ka buh jingeh wat ïa ki khynnah skul, ki khynnah college kiba hap ban ïa beh ïa ka por.