Shah pynkup burom haduh 300 tam ki samla pule ha Amlarem Constituency

Jowai, Risaw 06: Mynta ka sngi kila don haduh 300 tam ki samla pule naka thaiñ ka 7 Amlarem Constituency kila shah pynkup burom haki kyrdan pule bapher bapher kiba la wan shakhmat sha ka exam HSSLC, HSSLC, Degree, Master bad Doctorate ha ka jingïalang kaba la pynlong ha Enowel Hall Amlarem West Jaiñtia Hills District.
Ïa kane ka khusnam la tip kyrteng kum ka ‘7-Amlarem L.A Constituency Academic Award 2022’ ïa kaba la pynbit pynbiang da u MLA ka 7-Amlarem Constituency uba ba dei ruh u Minister I/c Education, Forest & Border Area Development u ma Lahkmen Rymbui, ha kane ka sngi la wan ban ïadon lang da u bah D.P Wahlang, IAS Chief Secretary jong ka sorkar jylla, u Dr. BDS Tiwari, IAS Commissioner of Secretary ka sorkar jylla, u Dr. L.R Bishnoi, IPS DGP ka jylla, nalor kiwei de ki ophisar sorkar ki nongïalam shnong, ki kmie ki kpa bad ki khynnah skul.
U ma Lahkmen haba ai jingkren ula pynpaw ka jingsngewnguh ïa kitei ki samla pule kiba la trei shitom ban wanrah ïa ka nam ka burom ïa ka thaiñ War Jaiñtia ïa Ri-Lum Jaiñtia bad ïa ka Jylla hi baroh kawei, ula ïaroh ïa ki kmie ki kpa jong kine ki samla pule kiba la ai mynsiem ïa ki khun jong ki khamtam ha ka liang ka pule puthi.
Shuh shuh ula kyntu ïa ki samla pule ba kin pynjania ïa ka pule puthi namar hapoh ka jylla ha ka sngi snem ki don haduh 35 hajar ki samla kiba pass naduh ki klas 10 ter ter shaneng, kumta ka long kaba eh bha ban pyndap kam hapoh ka jylla khamtam ïa ka kam sorkar, hynrei ban the lakam ïa kane dankam ban ïeng hala ki jong ki kjat bad ban seng ïa ki kam la jong kiba don kyrhai hapoh kane ka jylla.
Ula kyntu ban don ka jingïatreilang na ka bynta ban pynkiew ïa ka jingstad jingtip haka kane ka thaiñ bad mynta hi ka sngi ula pyntip na ka liang jong ki kila dep ban leit jurip ban ïoh Sanction ha kane ka Academic Session ban wan na ka bynta ban plie ïa ka klas XI, X, XI & XII (Arts bad Commerce) ha Pdengshakap namar kane ka dei ka jingkwah jong ka sorkar.
La pynphun pynphieng ïa kane ka sngi da ka jingïashim bynta lang da ka jingrwai jong ki khynnah skul jong ka Mang Hai Ryum Secondary School. La don ruh ka jingsam Special Award ïa ki longkmie kiba peit ïaka bha ka miat jong ka shnong Amlarem khamtam ha kaba ïadei bad ka jingkhuid jingsuba.