Shah mudui u Bah Marbud ha ki lai ngut ba kynnnoh shah thied ha u Bah Teibor Pathaw
Shillong, Rymphang, 23: U MLA barim jong ka Mawlai Constituency u Bah Embhahlang B. Syiemlieh, ka Kong Sarita Lyngdoh bad u Bah Bankyrshanborlang L. Nongbri ha ka sngi Balang ki la mudui sha u Returning Officer jong ka Mawlai Constituency pyrshah ïa u kyrtong ka Indian National Congress (INC) u Bah Marbud Dkhar uba la kynnoh ba kine ki lai ngut ki la shah thied da ka pisa ha u kyrtong jong ka National People’s Party (NPP) u Bah Teiborlang Pathaw.
Ha ka mudui ba la phah sha u Returning Officer, kine ki lai ngut ki la ong, ‘ha ka 18 tarik, Rymphang, 2023 ka por kumba 10:00 baje mynstep ha ka Common Platform ba la pynlong na ka bynta baroh ki kyrtong jong ka Mawlai Constituency kaba la long ha madan ïalehkai basketball ha Mawlai Nonglum, u kyrtong ka INC u Bah Marbud Dkhar u la kynnoh pyrshah ïa ngi da kaba ong ba ngi la shah thied ha u kyrtong ka NPP u Bah Teiborlang Pathaw kaba long ka jingkynnoh kaba lamler jong u pyrshah ïa ngi.”
“Kane ka jingkynnoh jong u kyrtong ka INC ym tang ba ka la ktah ïa ka longryngieng jong ngi bad ïa ka burom ka ijot jong ngi hynrei wat ïa u kyrtong jong ka NPP ruh kumjuh ïa kaba u kyrtong ka INC u la pynhiardor ïa ka longryngieng jong ngi hakhmat ki paid nongthep vote ym tang ka Mawlai Constituency hynrei ha ka jylla hi baroh kawei,” la ong kine ki lai ngut ha ka mudui.
“Kane ka jingkynnoh jong u kyrtong ka INC ym tangba u la pynkheiñ ïa ki kyndon jong ka Model Code of Conduct hynrei ka la poi haduh u pud jong ka Corrupt Practice katkum ka Section 123 (4) jong ka Representation of Peoples’s Act, 1950,” la bynrap ka jingmudui.
“Ha kaba ïadei bad kane, la kyrpad ïa phi ba phi shimkhia halor kane ka jingkynnoh pyrshah jong u kyrtong ka INC bad ngi kyrpad shuh shuh ïa phi ban shimkhia noh mardor kham kloi pyrshah ïa u kyrtong ka INC khnang ba pynkiar ïa u na kaba kynthoh biang hadien habud,” la kyrpad ïa ki lai ngut ïa u RO.
Na ka liang jong ka NPP Mawlai Unit ka la la pynrem jur ïa u kyrtong ka Congress bad dawa ba u dei ban panmap.
La ong ba kane ka jingkynnoh ka pynpaw ïa ka jinglong ba dang khynnah ha ka pyrkhat pyrdaiñ bad bym pat shongdor jong u kyrtong ka Congress na Mawlai Constituency.
“Ka dei ka jingkynnoh khlem nonngrim bad ngi dawa ba u dei ban sei ïa ka jingpynshisha halor ka jingkynnoh bad lada um lah, na ka liang ka kynhun ka dawa ba u dei ban panmap markhmat bad ha ki lad pathai khubor, lym kumta, yn hap ban ïaid katkum ki kyndon aiñ, namarba kane ka la pynthoh bria ïa ka kyrteng ki nongïalam bad ki nongkyrshan ka kynhun,” ki la ong.