Da lei lei ngam ailad ba ka Meghalaya kan kylla long ka Nongbah jong ka pop” Mukul

0

Shillong, Rymphang 23: U Dr. Mukul Sangma nongïalam jong ka TMC bad ha kajuh ka por u nongïalam jong ka liang pyrshah u la ong ba ka party TMC kan sa pynwandur thymmai ïa ka saiñ pyrthei hapoh ka jylla Meghalaya da kaba pynrem ïa ka sorkar MDA ba la lamkhmat da ka NPP da kaba kynnoh ba ka la shukor ïa ki samla. Ïa kane u Dr. Mukul Sangma u la ong haba ai jingkren ha ka jingïalang ha South Garo Hills, Dalu, Gambegre, North bad South Tura ha West Garo Hills ha ka sngi Palei.
U Mukul u la ong ba ki paidbah ki la sakhi ïa ka jingsynshar bym hok ka sorkar MDA ba la ïalam ka NPP ha ki san snem ba lah leit noh. “Ngim dei ban sngapjar hynrei ngin pynsngewthuh ïa ki paidbah kiba la ïohi ïa ka jinglong bym suidñiew jong ka sorkar MDA,” ong u Dr. Mukul.
Utei u nongïalam jong ka TMC u la ther tyngeh ruh ïa ka sorkar MDA halor ka jingthmu wanrah ïa ka Casino, “Ka sorkar MDA ba la ïalam da u Conrad Sangma ka la shukor ïa ki paidbah jong ka Jylla. Haba ki nomgïalam ñiam bapher bapher ki la tip shaphang ka jingthmu buh casino hapoh ka jylla, ki la leit ban ïakynduh ïa u Myntri Rangbah ban khang buh casino hapoh ka jylla Meghalaya. U la kular hakhmat jong ki hynrei hadien u la ai licence sop sop. Ngam ailad da lei lei ba ka Meghalaya kan long kum ka Nongbah jong ka pop, na kata kadaw ngin pynthikna ban pynduh pyndep ïa ka aiñ ïakhalai,” la ong u Mukul.
“Ki samla jong ka Jylla ki don hapdeng ka jingbynñiaw na ka daw ka jingbym ïoh kam ïoh jam ha kine ki san snem ba lah leit noh. Ngam ym shong kli kti tang ban peitkai ïa kaei ba ka sorkar ka la shukor ïa ki samla. Ngan ai ïa ki ka jingkyrmen watla ki la shah kyntait ha kane ka sorkar. Ka MYE Card scheme bad ka kular ban aikam ïa 3 lakh ngut kan dei kawei kaban weng ïa ka kyrduh kam kyrduh kam ha kane ka Jylla. Ka TMC kan pynwandur thymmai ha ka history jong ka saiñ pyrthei hapoh ka jylla Meghalaya, kumba ngi angnud ban shakri hom ïa ki paidbah.”
Shuh shuh haba kren ha ka jingïalang ha Gambegre, utei u nongïalam ka liang pyrshah u la ther tyngeh halor ka synshar khadar jong ka sorkar MDA, “Kawei kaba la pynlehraiñ bad ïakren bha kadei halor ka bamsap jong ka NPP. Tang ha ka taïew ba lah dep, u Home Minister u la ong ba ka Meghalaya kadei ka Jylla ba shyrkhei tam ka jingbamsap hapoh ka ri India. Ka Meghalaya kam dei kaba bamsap hynrei dei kito ki nongïalam kiba don ha ka sorkar kiba bat ïa u lakam synshar ha kaba ïa ka pisa paidbah na ka bynta ka roi ka par la buhrieh noh,” ong u Mukul.
U la ong shuh shuh, “Katkum ka kaiphod ba la phah na Delhi la ong ba baroh ki longïing hapoh ka jylla la pynrung ha ka skhim ban ïoh umbam umdih lyngba ka Jal Jeevan Mission. Ki la ïoh khusnam ruh hynrei ka jingshishabkanpaw ba ka kyrduh um ka dang jur na kadaw ka jingbym pyntreikam bha. Kane kadei ka jingbamsap.”
“Hapoh shi snem, ka TMC ka la nang pur stet ha baroh kawei ka Jylla da kaba ngi sakhi ba ka lama jong ka TMC ka kaweh haman la ki jaka. Ka TMC ka la nang kiew shaphrang ban ïa kiwei pat ki party. Namarkata ngin ïai trei shitom ban pynurlong ïa ka thong ba ka party ka angnud,” ong u Dr. Mukul.

Leave A Reply

Your email address will not be published.