Shah kyntait ka motion ba dawa pynjlan por ba la wanrah da u MLA ka VPP ha Dorbar Synrai

Shillong, Nailar 23: Ïa ka phang ne motion halor ka jingdonkam ban pynjlan ïa ka por ba la buh da ka Business Advisory Committee (BAC) na ka bynta ka Dorbar Synrai ba la wanrah da ka Liang Pyrshah ka Voice of the People Party (VPP) ha ka sngi Thohdieng ka la shah kyntait hapoh ka Ïingdorbar Thaw Aiñ.
Haba u Lamphang ka Ïing Dorbar u Thomas A Sangma u la tyrwa ïa kane ka motion da ka vote ki la mih ki kyntien jong ka jingshah kyntait.
Ha shwa ban buh ïa kane ka phang na ka bynta ban ïoh ka jingmynjur lyngba ka vote, u Lamphang u la pynthikna ïa u dkhot ka ïing ba un sa pynjlan ïa ka kynta lada ka idonkam.
“Nga ai kane ka jingpynthikna lada ka mih ka jingdonkam ban pynjlan ïa ka por ym pat ïa ki sngi jong ka sien shong dorbar,” u la ong.
Wat hadien ba u Lamphang u la kyrpad ïa u MLA ka 17th North Shillong Constituency u Bah Adelbert Nongrum ban wengnoh ïa kane ka phang ne ka Amendment Motion hynrei na ka liang u Bah Nongrum u la ong, “Nga burum ïa ka jingkyrpad ka jong phi hynrei ngan ym weng satia ïa ka amendment motion.”
Haba wanrah ïa kane ka phang, u Bah Nongrum u la ong ba ka jingbuh por tang 5 sngi ïa ka ïingdorbar da kaba tang 2 sngi na ka bynta ban ïoh ïatai ïa ki mat kiba kongsan (private members’ business) ka la long kaba lyngkot palat na ka bynta ka Ïing Dorbar Thaw Aiñ ka jylla ban ïoh jingbishar hok ïa kiba bun ki kam kiba ktah ïa ka jylla kiba donkam ka jingpynleit jingmut jong kane ka ïing kaba don burom kaba ïa kynduh tang 2 sien ha ka shisnem.
“Nga tieng ba ka jingpynduna ïa ka por na ka bynta kane ka ïing dorbar kaba long tang khyndiat sngi ka long shisha kumba pyndkoh noh ïa ka sur jong u paidbah. Da kane ngam mut ban ong ba dei tang ka sur jong ka party kaba nga sngew sarong ban mihkhmat, hynrei ka sur jong ki paidbah ha ki constituency bapher bapher kiba la khmih lynti shibun na ngi, na ki nongmihkhmat bad na kane ka ïing, naba ki don bun ki kam, ki mat bad ki jingsngewkhia ba dei ban rah bad ba dei ban sngap ban ïatai,” u la ong da kaba dawa ruh ba ka donkam ban pynjlan ïa ki sngi jong kane ka Dorbar Synrai ka jylla.
Haba jubab, u Symbud Myntri Rangbah uba khmih ïa ka Parliamentary Affairs u Bah Prestone Tynsong u la ong ba ka BAC ka la dep ban ïasyllok ïa ki jnit ki jnat bad ha ka jingshisha ha ka Dorbar Synrai kaba la dep ka por la buh hi san sngi.
“Ha kato ka sngi ha ka jingïalang ka BAC, na ka liang jong ka sorkar ngi ong ba donkam tang 3 sngi hynrei ngi la ong ba ka biang ba na ka bynta ki private members’ business ngi don 2 sngi. Da kaba pyrkhat lang, ngi la dep rai ba shu buh ka mih ka jingdonkam la ka long 1 kynta haduh 3 kynta ka jingshong dorbar lah ban pynjlan bad kumba long ngi la tyrwa bad mynjur ïa kane bad nga kyrpad ïa ka ïing ba kan pdiang ïa kane ka calendar,” u la ong da kaba pynthikna ba ki mat ba la rah da u dkhot yn sa rah ha ka jingïalang ka ban sa long jong ka BAC.
Katkum ka jingong u Bah Prestone ka jingpynjlan ïa ki sngi ha kane ka dorbar ba mynta kan ym lah ban long.