Ahmedabad: U Saket Gokhale, u National Spokerpesron ka Seng Trinamool Congress, uba la long u shiah ba thar ïa ka sorkar Meghalaya khamtam ïa ka NPP, u la shah kem hynnin ka miet na Jaipur, Rajasthan, halor ka jingkynnoh ba u la kren shu thaw bad kynnoh khlem nongrim ïa u Myntri Rangbah Duh ka ri, u Narendra Modi.
Dang hynnin ka sngi, u Gokhale, u la sei madab ïa ka jingpyndonkam bakla ka sorkar Meghalaya, khamtam u Ram Kumar, IAS, u ophisar rangbah jong ka Sorkar Meghalaya ha kaba ïadei bad ka jing pynlut pisa ka kompeni Meghalatan Age Ltd, kaba dei ka Kompeni ba u Ram Kumar u long kum u Chairman.
Ki Pulit Gujrat ki la kem ïa u Gokhale na Kad Liengsuiñ, halor ka jingthoh jong u ha ka Twitter ba u Modi u la pynlut haduh 30 klur ha ka por ba u leit jngoh ïa ka jingkieng doi doi, ka Morbi Bridge kaba la twa ha kine ki bnai baladep ha Gujrat ha kaba palat spah ngut ki briew ki la ïap.
Ki Pulit ki la kynnoh ba une u heh ka TMC, u la pyndonkam da ki kot ki sla ba shu thok ban kynnoh ïa u Modi.
