Shillong, Naitung 05: U Bah Deimaya Lang Siangshai, Editor Mawphor, mynta ka sngi, u la shah jied kum u President ba thymmai jong ka Shillong Press Club.
Ka Shillong Press Club kadei ka kynhun ïatreilang jong ka ki nongthoh khubor ha jylla Meghalaya.
Ïa ka elekshon la pynïaid da ka tnad DIPR bad ka jingïathep vote da ki 164 ngut ki dkhot bad u Bah Deimaya u la ïoh 91 vote. U Editor Mawphor u la pynliem ïa u Managing Editor jong ka Batesi TV, u Bah Joe Thangkhiew uba ïoh 67 vote bad u Bah Raphael Warjri, Producer jong ka Media Plus, uba ïoh 6 vote.
Lah ban kdew hangne ba u Bah DL Siangshai u la shakri ha ka kam thoh khubor mynta la 32 snem.
Ïa ka kam General Secretary la jop da u Bah Savio Diengdoh jong ka t7 News uba la jop khlem don kyrtong ban ïaleh pyrshah. Katba ïa ka post Treasurer la jop da u Bah Gershom Hat, Editor jong u Peitngor, uba la ïoh 113 vote pyrshah ïa u Bah Martin Nongkhlaw, uba la ïoh 50 vote. Kawei ka vote ka long invalid.
Na liang u Director jong ka DIPR, u M. Sangma, u la aiti ïa ka Certificate sha baroh kine ki lai ngut kiba la jop ha kane ka elekshon. Ha kajuh ka por u Sangma, u la ai khublei ïa baroh ki nongthoh khubor baroh kiba la ïatreilang na ka bynta ban pynlong ïa kane ka elekshon kaba ïaid beit ïaid ryntih.
La ïoh ruh ïa ka jingkren na kine baroh lai ngut kiba la jop ïa kane ka elekshon.
