Nongpoh, Naitung 05: Uwei u Rangbah briew uba kyrteng u Bah Bakstar Diengdoh uba na ka shnong Belahari u la shah kem ha ka tnat Forest Assam kaba dei ruh napoh khappud ka Meghalaya bad Assam kaba dang hab ruh hapoh Jirang Constituency ha Ri Bhoi District bad halor kane ka jingshah kem na ka liang u MLA ka Jirang Constituency, u Bah Sosthenes Sohtuh ha ka sngi Thohdieng u la pynrem jur bad pyrshah halor ka jingkem ia utei u Rangbah.
U Bah Sosthenes Sohtun u la pynpaw ïa ka jingpyrshah bad pynrem jur halor kane ka jingjia. La ong ba ki Pulit ka tnat Forest jong ka Assam ki la kem ïa u ha ka 3 tarik u Naitung 2024 ha ka ophis treikam ha Assam, ha kaba une u rangbah u khlem poi pyrkhat ba ki khot ïa u ban ïakren bad ki la kem kylla ïa u, da kaba kynnoh bad pynngat ha ki kyndon bapher bapher.
Haba kren sha ki lad pathai khubor, u Bah Sosthenes Sohtunu la ong ba kum u MLA ka thaiñ, u pynrem jur ïa kane ka jingkem ki Pulit ka tnad Forest ïa utei u rangbah bad u la pyrshah jur ruh halor kine ki kam jong jingbym burom ki Pulit ka tnad Forest kaba ktah pynban ïa ka shongsuk shongsaiñ ki paidbah ha katei ka thaiñ khappud ka Meghalaya bad Assam.
U la ong ruh halor kane ka jingkem ka tnad Forest ïa utei u rangbah, da kaba pyngngat kyndon ha ki kyndon bapher bapher ka long kaba ym lah ban pdiang bad kumba long mynta ka tnat Forest Assam ka dei ban sngewthuh ba haduh mynta ka dang don ka jingïapynbeit pud hapdeng ka Assam bad ka Meghalaya.
U la ong ruh ban wan ka shongsuk shongsaiñ, ka tnat Forest Assam ka dei ban pynlait noh ïa utei u rangbah khlem da buh kano kano ka kyndon bad kum ka tnad ka dei ban ïaburom markylliang bad ym ban wanrah ïa ka jingsyier ïa ka shongsuk shongsaiñ ki paidbah la ka dei na ka thaiñ Assam ne na ka thaiñ Meghalaya ha kitei ki shnong khappud.
U Bah Sosthenes Sohtun, u la ïathuh ruh ba u la dep ban ïakren sha u Myntri Rangbah ka jylla, u Conrad K. Sangma bad ruh sha ki bor ba dei peit ka sorkar Meghalaya, ba kin ïakren sha ka sorkar Assam na ka bynta ban pynlait noh ïa utei u rangbah bad ha kajuh ka por ruh u la kyrpad ïa ka sorkar Assam bad ka tnat Forest ka dei ban pynlait noh mardor ïa une u rangbah khnang ba kan wan ka shongsuk shongsaiñ ha kitei ki shnong khappud, u la bynrap.
