Ba sniew surok bad sahkut kali ha Dam, poi slem i Kong Bindas sha jingbishar ka MHRC

Shillong, Naitung 05: Ka jingsniew palat ka surok Umden, kaba i Kong Bindas Syiem, i la pynlong ka jingïakhih shah thngan ha une u bnai baladep, ka la ktah ruh ïa i mynta ka sngi haba i la poi slem sha ka jingkhot ai sakhi jong i halor ka jingujor pyrshah ïa u SP barim ka East Khasi Hills, u Ritu Raj Ravi, uba la mut ban kit jubor ïa i ha ka por ba i shah thngan hajan Addl. Secretariat sha jaka sumar.
Ha kaba ïadei bad ka jingujor jong ïa u Rituraj, ka Meghalaya Human Rights Commission (MHRC) ka la khot sakhi ïa i Kong Bindas Syiem mynta ka sngi bad ka la buh por haduh ka por 1:30 janmiet. Hynrei namar kane ka jingsniew ka surok bad ka jingsahkut kali ha jingkieng Dam Site, i Kong Bindas ryngkat ka jingsynran lang i Kong Purity Phawa, ki la poi haduh ka por 2 baje tam janmiet.
Na ka liang u Chairman ka Commission, namar kane ka jingbym poi i Kong Bindas, u la rai ban pynkut noh ïa kane ka case lane ka jingkhot ai sakhi halor ka jingujor ïa u SP barim ka East Khasi Hills.
Hynrei na ka liang i Kong Bindas i la thoh noh da ka aplikeshon ban ïathuh ïa ka daw bad ban kyrpad ïa ka Commission ban recall ne pyndam noh ïa ka order ba la pynkut ïa ka jingtohkit.
Ha ka por janmiet na ka liang ka Commission ka la pyntip ba la pdiang ïa kane ka aplikeshon jong i Kong Bindas bad ka la buh ïa ka 18 tarik mynta u bnai por 11 baje mynstep ban ïakren ïa kane ka jingkyrpad jong i.