Shillong, Nailar 29 : U Lamphang ka Iing Dorbar Thawaiñ ka Jylla, u Thomas A Sangma u la pynbna ba la ithuh ïa u Dr. Mukul Sangma kum u Nongïalam ba thymmai Liang Pyrshah ha Iing Dobar Thawaiñ ka jylla.
Ha kajuh ka por u nongïalam barim ka Liang Pyrshah Bah Ronnie V Lyngdoh, MLA ka Mylliem u la ïoh ïa ka jingithuh kumu Chief Whip jong ka Liang Pyrshah.
Ïa kane ka rai jong u Lamphang la pyntip da ka ophis u Commissioner & Secretary ka Assembly Secretariat ha ka notification kaba la phah ha kane ka sngi Palei.
Lah ban kdew hangne ba kane ka rai ka lamih hadien shisngi ba utei u nongïalam ka TMC u la leit ban kam ïa ka shuki Nongïalam ka Liang Pyrshah da ka jingkyrshan lang u MLA ba marwei ka Congress na Mylliem.
Kane kadei ka sien kaba ar ba u Dr. Mukul Sangma un shah jied kum u Nongïalam ka Liang Pyrshah ha Iing Dorbar Thawaiñ ka Jylla.
