Shillong, Nailur 26: Ka long ka burom bad ka jingsarong ïa ka thaiñ bad ka jylla Meghalaya baroh kawei ha kaba ka Myngken Christian High School kaba na Bhoirymbong, Ri Bhoi District, ka la shah jied ban mihkhmat ïa ka ri India ha ka Indo-French Football Tournament ban long ha nongbah Paris (France), naduh ka 25 haduh 30 tarik u Naiwieng.
Kumban shu kdew, ka Myngken Christian Higher Secondary School ka dei ka skul kaba la mihkhmat ïa ka jylla Meghalaya sha ka 63rd Subroto Cup International Football Tournament 2024, ha kaba ka la shah rem noh ha ka final ha ka Manipur lyngba ka tie breaker hadien ba ïakhaid mar shi kol ha ka jingïakhun.
Ka jingshah jied jong ka Myngken Christian Higher Secondary School ban leit ïashimbynta sha kane ka lympung ha Paris ka la wan hadien ba ka kynhun ka la pynpaw ïa ka jingtbit bad ka rukom ïalehkai kaba itynnat ha ka Subroto Cup watla ka la shah rem ha ka final. Lah ban kdew ba ha kane ka lympung, katei ka skul ba mihkhmat ïa ka Meghalaya ka la khyrwit haduh 29 kol tang ha ka Group Stage, bad tad haduh ban jam sha ka final ka la ïoh ban khyrwit haduh 39 kol.
Nalor ka Meghalaya, kawei pat ka kynhun ba shah jied ka dei ka T.G. English School na Manipur, ka kynhun lahduh jong ka Sub Junior Subroto Cup 2024. ïa kine ki ar kynhun la jied da ka Subroto Cup Society hadien ba ki la lah ban ïalehkai bha.
Kane ka Indo-French Football Tournament, ka dei kaba la pynlong da ka Indo-French Sports Association ha ka jingïatreilang bad ka Mairie de Malakoff, kiba thmu ban thaw ïa ka rynsan na bynta ki khynnah samla ba don sap ha ka phutbol jong ka ri India ban paw ha ka pyrthei. ïa kane ka lympung yn pynlong ha Complexe Sportif Marcel-Cerdan kaba ha Paris, kan kynthup ïa 10 tylli ki kynhun na India bad ri France.
Ka kynhun ba rah namlahduh kan ïoh ïa ka kabu ban ïoh jinghikai shi taiew bad kawei na ki klob ïalehkai phutbol ba paw, ka kabu ksiar ban shah jied, ka song khusnam, ryngkat ka trophy, kaba lah ban wanrah jingkylla ïa kine ki khynnah samla.
