Pynbna ka MCA ïa 3 ngut ki player nabar na bynta ka Ranji Trophy

Shillong, Nailur 26: Ka Meghalaya Cricket Association ha ka Sngi Palei ka la pynbna ïa lai ngut ki player kynsai ba nabar (guest professional player) ban mih madan ïa ka kynhun na bynta ka samoi lehkai 2024-25.
Kumban shu kdew, ka Meghalaya ka la ïoh rung sha ka thup ïakhun Elite Group mynta ka samoi hadien ka samoi ba seisoh ha ka Plate Group ha u snem 2023-24, ha kaba ka jylla ka poi kyrdan ba ar hadien ka Hyderabad.
Dang shen, ha ka 17 tarik mynta u Nailur, ka MCA ka la pyllait ïa ka thup kyrteng jong ki 12-ngut ki player trai jylla ban mihkhmat ïa ka Meghalaya na bynta ar tylli ki jingïalehkai ba sdang jong ka Ranji Trophy ryngkat bad san ngut ki standby. Katba ïa ka jaka jong kine ki lai ngut na ka liang jong ka MCA ka la pynbna ha kane ka Sngi Palei. Ka jingïakhun kaba nyngkong jong ka Meghalaya ha ka Ranji Trophy kan long pyrshah ïa ka Services shabar ban sdang naduh 11 haduh14tarik u Risaw shuwa ba kin wanphai shala ïing ban aireng pyrshah ïa ka Tripura naduh 18 haduh 21 tarik Risaw ha Shillong.
Kine ki lai ngut ki player ba nabar ki dei kiba la thmu ban pynkhlaiñ ïa ka kynhun ha ka liang tied (batting) bad kiba la shemphang ha ki jingïalehkai kriket. U Ajay Duhan u la ïalehkai kriket ha Haryana haduh mynta, katba u Sumit Kumar (wicketkeeper-batter) u la ïalehkai na bynta ka Jharkhand, Bihar bad dang shen na ka Nagaland kum u player ba nabar. Ha kawei pat ka liang, u Anirudh B, u la mihkhmat ïa ka Tamil Nadu bad ka Hyderabad. Baroh arngut u Sumit bad u Anirudh ki dei kiba la shemphang bha ha ka kriket bad na ka liang jong ka MCA ka khmihlynti ïa ki ba kin ïalehkai bha ban ïarap ha ki jingïakhun na bynta ka Meghalaya.
Ka MCA ka la pynbna ruh ba u Kishan Lyngdoh, u wei na ki rangtied ba kynsai jong ka Meghalaya, un ïalam ïa ka kynhun kum u kapten sa shi sien pat. Lah ban kdew ba ka samoi 2023-24 ka dei ka samoi kaba seisoh bha ïa u hadien ba u la lah ban kynjoh da kaba khyrwit haduh 695 ron na ki hynñiew sien ïalehkai, bad khyrwit ruh ïa ka 200 ron ba nyngkong na bynta u player jylla Meghalaya ha ka lympung kriket ba kham paw. U rangkawangbol ba kynsai jong ka kynhun u ba la seisoh ruh ha ka tied, u Dippu Ch Sangma un shim ïa ka bynta kum u symbud kapten hadien u Kishan,
Ka thup kyrteng jong ki rangïalehkai ka Meghalaya ha kane ka Ranji Trophy (na bynta ar tylli ki jingïalehkai ba sdang): Aryan Borah, Akash Kumar Choudhary, Arpit Bhatewara, Bamanbha Shangpliang, Bijon Dey, Chengkam Sangma, Dippu Sangma (V-C), Jaskirat Singh Sachdeva, Kishan Lyngdoh (C), Ram Gurung, Roshan Warbah, Swarajeet Das, Ajay Duhan, Sumit Kumar, Anirudh B
Standby: Adarsh Joshi, Anish Charak, Lerry G Sangma, Shembhalang Pyngrope, Yogesh Tiwari
Support staff: Prabhakar Bairgond (Head Coach), Moisten Ch Marak (Assistant Coach), Surojit Biswas (Physio), Vikash Singh Chauhan (Trainer), Dister Marbaniang (Manager)