Mynta ka Jylla Meghalaya khamtam ka nongbah Shillong ka la pawnam bha ha ka jingbun ki briew kiba ngop bad kyrni ha u drok. Kane kam ktah shuh tang ïa ki samla ba dang khie hynrei wat ïa kiba la noh ka rta bad ki kynthei khynnah ruh ki ngop lang. Kane ka jinglong jingman ka la long kaba ishyrkhei haduh katta katta bad ka la buh jingma ruh wat ïa kito ki khynnah kiba dei na ka longiing kaba tipbriew tipblei bad khamtam eh na ki longiing kiba kham duna ka ïoh ka kot.
Hangne, ki don ki mat ba kongsan ban ïarap ïa ki samla ban lait na ki drok bad ki jingdih buaid. Lah ruh ban ong ba ki samla ki lah ban lait na kine ki jingpynshoi baroh kiba wan na u drok kadei da kaba tei ïa ka jingshanïah ha lade bad ka jingsngewrit, nangta da kaba ïashim bynta ha ki jingïalehkai byrngia bad ki kam ba dei shabar jong ka jingpule, pynlut por ha ki jingïalehkai kiba lah ban wanrah ïa ka koit ba khiah khamtam eh haba ïadei bad ka bor pyrkhat.
Pynmlien ruh ban don ka jingshaniah halade naduh mar ïa khie mynstep bad pynsngewthuh kiei ki jingma kiba lah ban mih lada kum ngop lane kum shah pynbeit ha kum kitei ki jingdih buaid. Lada jia ba kum ngop, wad kham kloi ki lad jingïarap kiba lah ban kyrshan bad tynrong lang ïa phi ha kum kato ka por.
Kiwei pat ki jingmlien kiba bha kiba lah ban leh ki kynthup ruh ïa ki jingpynmlien ban don bynta ha ki kam trei mon sngewbha bad ruh ha ka jingshakri ha ka imlang sahlang bad ruh ka jingpynlut por ha ka mariang. Ha kajuh ka por don pat ki lad ki lynti ba kumno ki samla kin lait na ki jingpynshoi kiba bun. Kawei na kine ka long ka jingkyrshan, ka jingieid bad ka jingïarap na ki bahaiing ha sem, khamtam eh ka jingieid na ki kmie ki kpa, ki hynmen ki para.
Lada batai sani bha, kane kadei ka bynta kaba kongsan bha. Ha kane ka juk mynta, ki kmie ki kpa kim don por shuh ïa ki khun. Ym dei tang katta, ha ki 15 bad 20 snem mynshwa bun ki longiing ki don khun 4ngut haduh 6 ngut hynrei mynta pat kiba don bun khun eh ruh dei arngut bad kumba 60 haduh 70 persen ki don tang iwei i khun. Kumta, ha kito ki longiing kiba don bun khun ka don la ka jong ka jingmyntoi namar shi para ki lah ban leitkai ne pynlut por lang khamtam ha kito ki rta jong ka jingkhie samla. Kane ka jingdon bun shi para ka weng noh ruh ïa ka jingsngewblaw, sngew long marwei bad lada don ei ei ruh ki la ïoh ban ïathuh khana ne syllok para ma ki.
Nangta, kawei pat ka lynti ka long da ka jinglah jong ki nonghikai ha skul ban ïa syllok bad ki khynnah khamtam kito kiba dang khie. Kawei pat ka sienjam ka long ba lada don ki seng samla kiba khlaiñ ha ki shnong kane ruh kan dei ka bynta kaba khraw bha bad ki samla ki lah ban ïakhun ïa kine ki kam. Lah ruh ban ong ba lada ki samla shnong ki khlain wat kito ki samla ba kyrni ha kito ki kam dih drok ruh kin shynrain ban mih bad kane khamtam kan long ruh ïa ki nongkhaii drok ban rung ha ki shnong ki thaw.
Ha kawei pat ka liang hap ban pynsngewthuh ruh ba ki samla kiba thrang ban kiew ha ka jingim khamtam ban poi shaka thong ha ka jingim ki hap kiar lailum laiwah na kum kine ki jingpynshoi kiba ap thap na kadiang na kamon ban pynngop ïa phi. Khlempep kito kiba la ngop ha kum kine ki jingjïa kin ym lah satia ban pynleit jingmut ha ki jingpule, kin sdang ruh ban kiar ban don bynta ha ki kam iing kam sem la ka long ha ka leit ka wan bad ki kmie ki kpa, ki hynmen para ne wat sha ki jingïakynduh lang. Kaba kham ktah kan dei eh ruh ha ka met ka phad bad khamtam eh ka jingpynlut ïa ka pisa.
Tangba kine kim dei satia kiba pynduh jingkyrmen hynrei ki don ki lad kiba lah ban pyllait bad ïarap mynta lei lei ki la mih bun ki kynhun sengbhalang kiba kloi ban plie lad bad kyrshan ïa kum kine ki samla kiba bakla ïaid ha ka jingim.
