Nongpoh Nailur, 24: Kawei ka longkmie Khasi kaba la tip kyrteng kum ka Kong Juki Marwet kaba sah ha ka shnong Barapathar ka shnong ba don ha khappud ka Meghalaya bad Assam ka la shah byrngem byrsit da ki ktien khlem akor ha ki ar ngut ki khar Assam kiba shongwai ha ka shnong Barapathar, Ri-Bhoi hadien ba kane ka longkmie ka la ai sngewbha ïa ka jaka jong ka na ka bynta ban shna ïa ka top um lyngba ka skhim JJM ban pynbiang umbam umdih ha kane ka shnong.
Ki ar ngut kiba la byrngem ïa ka Kong Juki ki dei kiba la tip kyrteng kum u Tutu Majumdar bad u Nurul Islam kiba dei na ka jylla Assam bad kiba shongwai pat ha ka shnong Barapathar.
La kynnoh ba u Majumdar bad u Islam ki dei ki briew kiba ju pynmih huri hura hapoh ka thaiñ bad ha ka sngi Saitjaiñ ki la leit ban byrngem ïa ka Kong Juki da ki ktien khlemakor haduh ba la mih ruh ka jingthmu ban pynpra ïa ka top um hynrei da ka jingpyneh ki nongshong shnong jong ka Barapathar bad ka jingkloi ki Pulit ka Pilangkata Out Post la lah ban khanglad ïa ka jingthmu ban pynpra ia ka top um.
Ka jingshna ïa ka top um ladep palat mar shiteng hynrei la hap ban pynsangeh noh hadien ba ki bor ka Sorkar Assam ryngkat bad ki Pulit ba la synran da u Circle Officer ka tnad Land and Revenue ki la leit ban pynsangeh shuwa ïa ka jingpyntrei ïa ka top um.
Ki nongïalam shnong jong ka shnong Barapathar ryngkat ka jingdonlang jong u Rangbah Shnong u Bah Soni Nongtri ki la ïathuh ba u Tutu Majumdar bad u Nurul Islam ki dei ki briew kiba ju mlien ban thaw jingklumar bad kiba ju khanglad ban wanrah ia ki kam pynroi hapoh ka shnong ka thaw bad dang ha ki snem kiba ladep, kine ki kijuh ki briew kiba pynpra ïa u maw nongrim na ka bynta ban shna ïa ka surok shnong lyngba ka skhim MGNREGA ha kane ka shnong kat haduh ba ka la mih ka jinghuri hura kaba jur hapoh thaiñ.
Halor ka jingshah byrngem jong ka Kong Juki, ki bor synshar shnong ha ka sngi u Blei ki la mudui da ka ejahar pyrshah ia u Tutu Majumdar bad ïa u Nurul Islam ha Pilangkata Police Outpost bad dawa ia ki bor ka aiñ ban kem mardor ïa kine ki arngut ki nongpynwit ym tang ïa ka shongsuk shongsaiñ hynrei wat ïa ka roi ka par.
Ka Kong Juki Marwet ka la ujor ruh da ka ejahar ha ki Pulit ka Pilangkata Outpost pyrshah ïa u TuTu Majumdar bad ia u Nurul Islam halor ki kam byrngem byrsit pyrshah ïa ka ïing ka sem ka jong ka la ar sien kynthih.
