Sha u myntri ba peit ïa ka Tourism phah jingthoh ka JNC-KC halor ka jingbym poi trei u heh ba dei peit ïa ka ophis Tourist Officer & Information Centre Khliehriat mynta la shi snem

Khliehriat, Nailur 11: Ka Jaiñtia National Council, mynta ka sngi lyngba u Deputy Commissioner ka East Jaiñtia Hills District, u Abhilash Baranwal, IAS ka la phah da ka jingthoh sha u Myntri ba dei peit ïa ki kam jngohkai pyrthei (tourism) u bah Paul Lyngdoh ha kaba ka seng ka la ujor halor ka jingbym poi trei u heh ba dei peit ia ka ophis Tourism ha Khliehriat (Tourist Officer & Information Centre Khliehriat), namar katkum ka jinglap jong ka seng la ong ba u heh jong katei ka tnat u khlem poi trei mynta la jan don kumba shi snem.
Ka seng lyngba ka jingthoh, ba la soi da u General Secretary JNC Khliehriat Circle, u samla Mebanteilang Sukhlaiñ, ka la dawa na u myntri sorkar ba dei ba buh bujli noh da uwei pat u heh sorkar u ban peit ïa kane ka ophis Tourist Officer & Information Centre East Jaiñtia Hills District bad la pynpaw ruh ba ha ka jingleit jurip ka seng ia katei ka phis ha ka 31 tarik u nailar ka la lap ba ba watla ka ophis ka plie hynrei ym don nongtrei ha katei ka ophis bad don tang u peon bad hadien ka jingwad jingtip, ki dkhot ka seng ki la ioh jingtip ba u heh sorkar (officer) uba dei peit ïa katei ka Centre um ju poi sha ophis mynta la don kumba shi snem, kane ka la pynsah umdum ïa ki nongïalam bad ki dkhot jong ka seng, kumta na ka liang ka seng ka la dawa na utei u heh sorkar jong ka tnat Tourist Officer and Information centre Khliehriat bad u dei ban ai ka jingpynshai halor ka jingbym poi trei jong u mynta la don kumba shi snem, namar kane ka jingbym don u heh sorkar ha ophis ka buh jingeh ïa ki paidbah kiba donkam ha ki kam ki jam ban kyntiew ïa ka kam jngohkai pyrthei ha ka district.
“Ka seng ka buh jing jingkylli ruh ba ka sorkar ka ai tulop ne em ïa kine ki nongtrei bym ju wan sha ophis?, kumba la pawshai, ba bun ki jaka jnngohkai kiba don ha kane ka thaiñ bad ki donkam shisha ban ioh ïa ka jingiarap bad jingkyrshan na katei ka tnat treikam khnang ban wanrah jingmyntoi ym tang ïa ki shnong ki thaw hynrei ïa ka jylla hi baroh kawei, ka seng ka kyntu ruh ïa ka sorkar ba kam dei ban shu lehkai ïa ka pisa jong u paidbah”
La ong ruh ba ka jingliet jurip jong ka seng ïa katei ka tnat treikam ka dei namar ba ka seng ka la ioh ïa ka jingujor na kiba bun ki nongshong shnong, kiba la ju ujor ba ym ju don nongtrei bad kim ju iakynduh ïa u heh sorkar (officer) ha katei ka ophis ‘Tourist Officer and Information centre’
Naduh katei ka sngi ba leit jurip, na ka liang ka JNC Khliehriat Circle ka la kren da kaba shai ïa u heh sorkar uba peit ïa katei ka tnat jngohkai pyrthei (Tourism) kaba don ha Khliehriat ba “Lada ka jia ba um don mon ban trei na ka bynta ka bha ka miat jong ki paidbah na ka liang ka seng ngi pynrem jur bad kyntu ruh ïa ka sorkar kaba dei ban peit bad ban tuklar halor kane bad dei ruh ban pynshai na kaei ka daw kaba la pynlong ïa katei ka ophis ban long thylli, namar kane ka ophis ka dei ban peit ïa ki kam jngohkai pyrthei hapoh ka district”
Ka seng, lyngba u General Secretary JNC Khliehriat Circle, u samla Mebanteilang Sukhlaiñ, ka kyntu jur ïa u myntri, u bah Paul Lyngdoh ba un shim khia noh kham kloi ïa kane ka kam ha kaba u heh sorkar u dei ban sngewthuh ïa ka jingeh jong ki briew ka thaiñ, namar ban kan ktah ïa kino kino ki kam kiba dei bad ki lad ban kyntiew shuh shuh ïa ka kam jngohkai pyrthei ha ka thaiñ, kumjuh ruh ban wanrah jingmyntoi ïa ki briew jong ka thaiñ ha ka ban kyntiew ïa ka ioh ka kot lyngba ki kam jngohkai pyrthei