Mawsahew, ‘Nailur 11: Ka Mawsahew Tynrong kaba hap hapoh ka Tynrong Sirdarship, ka la ïoh ïa u Sordar ba thymmai u bah Parlingdon Wanlah.
Kane ka jingïoh Sordar thymmai ka dei hadien katto katne tylli ki snem ba ka aïom treikam jong u Sordar barim ka la kut bad ba la pynïaid ïa ka kam da u Acting Sordar kaba na ka liang jong ka Khasi Hills Autonomous District Council (KHADC), ka la ai ïa ka hukum ba dei ban jied noh ïa u Sordar ba pura. Haba la kut ka por ba la buh na ka bynta ban thep dorkhas la shem ba ym shym la don mano mano ruh ban thep kyrteng lait noh u bah Parlingdon Wanlah.
Kumta na ka liang ki bor ba dei khmih ka District Council ki la ai ïa ka rai ba u bah Parlingdon Wanlah ba un long u Sordar ba pura ka Mawsahew Elaka Tynrong.
Namarkata, lah ban ong ruh hangne ba u bah Parlingdon Wanlah u la ïoh ïa ka jingkyrshan ba pura na kiba bun ki paidbah ka shnong rangbah bad samla kumjuh kaba la sakhi na ka jingïapoi paidbah jong ki ban wan synran ïa u ha ka por ba wan thep kyrteng hapoh District Council.
