Ha ka 8 tarik mynta u bnai, u Director of School Education and Literacy, u Swapnil Tambe, IAS, u la ai da ka Show Cause Notice ne ka jingkhot hajir ïa i Principal jong ka Government Girls Higher Secondary School, Jowai, ban pynshai halor ka jingtem ïa ka jingrwai Prah da ki Khynnah Skul ha ka sngi ba pynlong ïa ka jingïalang burom ïa ki nonghikai ne ka Teacher’s Day, kaba dei ha ka 5 tarik mynta u bnai.
Ka Notice ka ong ba i Principal i dei ban pynshai balei ba ym lah ban shim jingpynshitom ïa i, haba i la shah sngewbha ia ki khynnah skul ban tem bad iashad sngewbha da kane ka jingrwai, namar kadei ka jingrwai jong ka Seng Saiñ Pyrshah bad ka long pyrshah ïa ka jingtreikam jong ka sorkar.
Lehse kane ka Notice jong une u heh ka tnad pule puthi jong ka sorkar Meghalaya ka pynkyndit ïa kiba bun bad kumjuh ruh ka pynsamrkhie ïa ka jingleh une u ophisar IAS. Ka daw ka long ba ym ju kham jia koit kaba kum kane na ba na ka jingïakem ïasngewtynnad ki khynnah skul da ka jingrwai kaba ki sngew shongshit shu shah khot hajir eiei kha ma kha i Principal. Ka kyndon aiñ kaba khang ïa ki shakri sorkar ban ïashim bynta ha ki kam saiñpyrthei ne ban ïakyrsum bad ki seng saiñpyrthei kadei tang ka Service Rule (Conduct) 2019, kaba khang pyrshah ïa ki nongtrei sorkar ban ïakyrsum bad ki Seng Saiñpyrthei. Kane ka Rule kam kren ïa kata ka jingtem jingrwai jong ki Seng Saiñpyrthei ha ki skul, ki kolej ne hangno hangno ruh.
Kane ka jingtem bad jingshad jingrwai Prah ha katei ka skul kadei kaba la lehi da ki khynnah skul bad ka jingrakhe burom ia ki nonghikai ha ki skul, kadei kaba la leh ne organise hi da ki khynnah skul. Nalorkata kane ka jingïashad iakmen ki khynnah skul ruh kadei hadien ba la kut ka jingïalang pynkup burom ïa ki nonghikai, ym dei hapdeng ka jingïalang.
Te kaei kaba ïohi na kane ka jingkhot hajir ne ka jingpan jingpynshai na i Principal jong katei ka skul, ka i long khyllung khynnah bad kam i don nongrim eiei ruh em, hynrei kadei beit ba une u heh ophisar jong ka tnad pule u shah pynbor hano re hano ban leh ïa kane, namar ym sngew lah ngeit bad kat u ophisar IAS un bieit haduh katne katne ba um nym tip ne sngewthuh bha ïa ki kyndon treikam jong ka sorkar.
Ym lah ruh ban len na ka jingrwai ‘Kongdeng Kongnah ha u Prah’, ba la paw da u Bah Smiling Mylliemngap bad rwai da u Bah Skhem Marboh, kadei ka jingrwai kaba pawnam eh haduh mynta. U Bah Smiling u la ai sngewbha ïa kane ka jingrwai sha ka Seng Voice of the People Party (VPP) namar udei na Nongkrem Constituency bad ai sngewbha kum ka jingieit ïa u Bah Ardent Miller Basaïawmoit, President jong ka VPP. Ym don ba tip kaei ka daw ba kane ka jingrwai ka pawnam haduh katne katne kat haduh ba kat shaba leit ki briew ki shu tem beit ïa kane ka jingrwai. Nangta ym tang ki skul kiba tem bad shad ia kane ka jingrwai, hynrei ki kolej, ki univesrity, ki ïing ïathoh, ki jaka ïalehkai sports, bad kumta ter ter.
Ka daw lehse ka long ba ki paidbah ki sngewieit ïa ka Seng VPP bad ki kyrshan ïa ka jingtreikam jong ka Seng. Nangta ka lah ban dei ruh ba kadei ka jingrwai kaba kham pher bad kaba kham shoh bha ki kyntien. Ym tharai ba baroh ki khynnah, ki khunlung kin da tip eh ïa kata ka Seng VPP ne ki nongïalam jong ka,m hynrei shu sngewtynnad bad sngew shongshit ïa ka jingrwai. Nangta kane ka jingrwai kam dei kaba don ki kyntien ban beiñ ban khoh ne ban kren beiñ ne isih jaidbynriew. Kadei ka jingrwai pynban kaba khot sha ka jingbha sha ka jinghusiar jong ka imlang sahlang bad ka jingïada jong ka jaidbynriew.
Hynrei kaba kham kongsan hangne ka long ba ka show cause notice kam don kano kano ka kyndon lane kam kdew ïa ka kyndon ba i Principal jong ka Government Girls HSS Jowai i pynkheiñ. Hato lah ban pynshitom ïano ïano la ka long ïa ki nongrei sorkar ne ïano ïano ruh haba ym don ki kyndon. Kane hi ka pynpaw ba dei tang ka jingsyier ka jingkhynñiuh jong kita kiba don ha ka bor namar ka jingbeh ka lyer lyngba ka jingrwai ‘Kongdeng Kongnah ha u Prah”.
