Mairang, Naitung 27: Ka thaiñ Myrïaw Eastern West Khasi hills kaba kynthup ïa ki bun phew tylli ki shnong ka dei ka thaiñ kaba sei soh bha ha ka rep ka riang bad kumba 98 % na ki nongshong shnong ki dei ki nongrep.
Ki mar rep ba kongsan ha katei ka thaiñ ki dei u riewhadem, u phan, sohphlang, ki jhur kum u kubi, sohsaw, biskot, u kba bad ki soh ki pai ba bun jait. Nalor kata ki shnong ha katei ka thaiñ naduh Myrïaw, Mawkamoit, Masar bad kiwei kiwei ki shong ki dei ki jaka pdeng ha kaba rep sohsaw bad sohmynken jhur.
Ha kine ki snem ba la dep baroh ki nonrep sohsaw na katei ka thaiñ ki ju pynïaid ïew ïa u sohsaw dakaba kit da ki Mahindra Pickup haduh Assam hynrei haune u snem ka dei ka sien ba nyngkong ba ki nongkhaï na ka jylla Assam bad kiwei pat ki jaka ki la wan thied hi na ki nongrep naduh ki shnong ki thaw.
U bah G.Parïong sordar ba rim ka shnong Mawkamoit haba ïakren bad u nongthohkhubor u la ong ba ka jing wan thied hi jong ki nongkhaï ïa u sohsaw na ki shnong ki thaw ka la pynsuk shibun ïa ki nongrep namar kim don kam shuh ban pynshitom ïalade ban leit wad ïa ki ïew ki hat sha Assam kumba ju leh ha ki snem ba la dep.
Nalor kata u la ong ruh ba ha ki snem ba la dep shuwa ban poi ka aïom kheit sohshaw ki nongrep ki la hap ban phah briew ban leit sha Assam ban wad ïa ki jaka ban leit pynhap ïa u soh saw bad ka long ruh kaba shitom haduh katta ktta namar ba ki lada ym ïakynduh ïa ki nongthied kiba biang kam don satia ka jingïoh nong namar ka lynti kaba jngai nalor ka bai kali ki don ruh sa kiwei ki jinglut ha lynti kumta lada ym ïakynduh ïa ki nongthied kiba biang ka jingduh nong ka bun .
U bah Parïong u la ong ruh ba ha une u snem u sohsaw u kham biang bha namar ka jingïoh slap ha ka por ba biang. Shuh shuh u la ong ba naduh ka taïew ba la dep ki nongrep ki la sdang ban kheit sohsaw hynrei ha kaba sdang ki nongrep ki dang lah ban pynïaid tang ha ka dor 15 – 16 tyngka shi kilo hynrei ha kine ki ka la kiew sha ka 20 tyngka shi kilo tang bay m lah ban ong pat la ka dor kan dang kiew shuh shuh ne kan hiar ruh namar ka jingpynmih sohsaw ka la nag bun.
Ha kajuh ka por u la ong ba ki naduh kine ki sngi ba la dep ki nongkhaï naduh Garo hills bad Dudhnoi ki la wan poi shaduh kitei ki shnong ban thied jhur, sohsaw bad kiwei kiwei ki mar rep. U la ong ruh ba ka jing wan ki nongkhaï na kiwei pat ki jaka sha katei ka thaiñ ka la long ka jingkyrkhu kaba khraw ïa ki nongrep.
