Shillong, Lber, 08: Ka Ingbishar Meghalaya High Court ka la pynjynsur ïa ki sngi set along sha ka 10 snem ïa uwei u briew uba la shah rai pynrem halor ka jingdonkti ban leh be-ijot ïa iwei i heprit kynthei ba dang 5 snem ka rta.
Ïa u Rajingstar Thabah la kem halor ka jingujor da ka kmie jong ine i heprit sha ki Pulit ka Sohiong Police Outpost ha ka 3 tarik u Naiwieng, 2017.
U Special Judge (POCSO), Shillong u la pynmih ïa ka rai bishar ha ka 11 tarik, Naitung, 2022, kaba rai set along shi jingim na ka bynta 18 snem bad phah siew ïa ka kuna kaba T. 20,000 hajar bad lada um lah ban siew ïa ka kuna un hap ban shong along sa lai bnai. Ïa ka pisa ba la daiñ kuna la bthah ban siew sha i lanot.
Ha ka rai bishar ba la pynmih ha ka 7 tarik Lber, haba shong bishar ïa ka Criminal Appeal, ka Division Bench kaba kynthup ïa u Chief Justice S Vaidyanathan bad u Justice W Diengdoh ka la ong, “halor kane, ïa ka Criminal Appeal la shah ha kane ka bynta bad ïa ka rai pynrem bad ban set along la pynmih da ka Ingbishar ha ka 08.07.2022 bad ka hukum ban set along la pynmih ha ka 11.07.2022, ba la pynmih da u Special Judge (POCSO), Shillong ha ka Special POCSO Case No.5 of 2018 la pynkylla ha kaba u nongshah mudui un shong along na ka bynta shiphew snem bad siew ïa ka kuna kaba T. .20,000 bad lada um siew ïa ka kuna un hap ban shong along sa lai bnai. Kumba la hukum da ka Trial Court, ïa ka kuna dei ban siew sha ka lanot, lada ym pat siew.”
