Shillong, Lber 08 : Ka Expert Committee ban khmih bniah halor ka Reservation Policy lane ka bhah thungkam thungjam ha ka jylla ka la shong ïa ka jingïalang kaba nyngkong eh markhmat bad ki heh sorkar jong ka jylla hynne ka sngi Thohdieng.
Ïa kane ka jingïalang la pynlong hapoh ka jingïalam jong u Justice (Retired) Mool Chand Garg. Kumban shu kdew hangne ïa ka Expert Committee la thawe da ka sorkar jylla ha ka 12tarik Nailur, 2023 ban khmih bniah halor ka bthah thungkam thungjam.
Shwa kane, ka committee ka la don bun tylli ki jingïalang online bad ka jingïalang ha kane ka sngi kadei kaba nyngkong ban kynduh markhmat, ong ka kyrwoh.
Ha kane ka sngi, u Chairman bad ki dkhot ki la leit ruh sha ka ophis treikam jong ka Expert Committee kaba don ha ophis treikam jong u Assistant Commissioner of Food Safety, Lachumiere, Shillong. Ki dkhot ka Committee ki la shong ruh ïa ka jingïalang ha kaba ki la ïa kren katto katne ki bynta kiba dei na ka bynta ki sienjam ban ïaid shakhmat ïa ka kam.
Katkum ka kyrwoh, la ong ba ka jingïalang kaba bud jong ka Committee kan long biang ha u Ïaiong mynta u snem.
