Ha ka dor 29 klur buh mawnongrim u CM ban tei ïa ka Hospitality Complex ha Mawlyndep

Shillong, Lber 08 : U Myntri Rangbah ka jylla, Conrad K Sangma ha ka sngi Thohdieng u la buh mawnongrim na ka bynta ban tei ïa ka Mawlyndep Hospitality Complex ha ka shnong Mawlyndep ha ka jingmang kaba kot sha ka 29 klur tyngka.
Ha kane ka sngi la donlang ruh u Myntri ka tnad Tourism, Bah Paul Lyngdoh kumjuh u MP ka Rajya Sabha, Dr. WR Kharlukhi nalor kiwei kiwei.
Ïa katei ka projek kaba la mang lyngba ka New Development Bank, yn tei ha ka jaka kaba ïar haduh 10 akar ei ei.
Haba kren ha kane ka sngi, u Myntri Rangbah u la pynshai ruh halor ka jingsngewthuh bakla kaba ïadei bad ka jingshim ram jong ka sorkar khamtam na ki bank bapher bapher na shabar ri.
“Ka sorkar Meghalaya ka la shim ïa ka jingkyrshan pisa na shabr hynrei kane pat ka wan lyngba ka sorkar India kaba la pynduna ha ka dor kaba 72 persen,” u la ong.
U ong ruh ba ka Meghalaya kadei kaba ioh bun bha ki jingmyntoi na ki projek kiba kyrshan na shabar ri ki ba la kot sha ka 7500 klur ba wan lyngba ka sorkar pdeng. Nalorkata, u ong ruh ba ka sorkar jylla ka buh thong ban pynlut haduh 4000 klur tyngka ha ki kam jngohkai pyrthei ha ki saw snem ban wan khnang ba kan lah ban aikam haduh 50,000 ngut ki samla.
“Dang hynin ka sngi u Myntri Rangbahduh ka Ri u la pynbna ban ai shuh sa 120 klur tyngka na ka bynta ban pynbha ïa ka East Khasi Hills bad kiwei pat ki bynta jogn ka jylla,” u la ong. Haba kren pat halor katei ka projek ha Mawlyndep, u Myntri Rangbah ula ong ba ïa ka work order la dep ban ai sha ki kontraktor bad la khmih lynti ba kin pyndep haki 24 bnai kaba la buh thong ba la kumno kumno yn ioh ban plie noh ha u 2026.
Na ka liang u Bah Paul pat u la ong ba ka kam jngohkai pyrthei kadei ka kam kaba lah ban ai kamai junom da kaba ai nuksa ruh ïa ka Sohra kaba la myntoi bha na ka kam jngohkai pyrthei.
La ioh ruh ïa ka jingkren na u Dr. WR Kharlukhi uba la batai bniah ba ka jingjied ïa ka Mawlyndep ban leh ïa katei ka projek ka long ruh ban khring ïa ka kam jngohkai pyrthei kaba lah ban ioh ruh ïa ka koit ka khiah.