Imat ki Sengbhalang kim tip ïa ka Employment Exchange bad jingbthah ka Sorkar: DC
Halor ka jingthung kam Contract ha ka tnad Social Welfare
Nongstoiñ, Lber 08: U Deputy Commissioner ka West Khasi Hills District Bah Garod LSN Dykes, ha u kyrwoh khubor ba u la pyllait mynta ka sngi, u la pyntip ba ka Sorkar ka la bthah ïa baroh ki tnad treikam/Board/Corporation, ba kin pan briew na ka Employment Exchange haba ki don jingthmu ban thung kam contract ha kino kino ki kam kiba lait.
Kane ka la mih mynta ka sngi 8 tarik Lber 2024, kum ka jingpynshai halor ka jingpyrshah jong ki kynhun Sengbhalang ba khot interview thung kam contract ka Ophis jong ka District Socïal Welfare Officer ka WKH, Nongstoiñ myn ha ka 4 tarik Lber, 2024.
Lah ban kdew ba u Deputy Commissioner ka West Khasi Hills, u la pynsangeh shuwa ïa kane ka interview thep kam, namar ka jingpyrshah jong ki Sengbhalang ba ka Ophis ka DSWO ka la khot interview tang ïa ki samla ba la register kyrteng hapoh ka Employment Exchange.
U Deputy Commissioner u la ong, la sngewthuh ba ki Sengbhalang ba pyrshah bad ki nongwad kam kim da tip bha ïa ka jingtreikam, ka bynta bad ka kamram jong ka Employment Exchange bad ka jingbthah jong ka Sorkar ban pyndonkam ïa ka jingshakri jong ka Employment Exchange.
U la ong ba dei namar kane ka daw ba la pynsangeh shuwa ïa ka interview thep kam jong ka District Social Welfare Office ka West Khasi Hills. U ïathuh ruh ba ïa ka Employment Exchange ka Nongstoiñ la seng ha u snem 1974 bad ka Employment Information Assistant Bureau ha Mawshynrut la seng ha u snem 2011. Ka Employment Exchange ka Nongstoiñ ka la ai ka jingshakri ïa ki nongwad kam ka District la 50 snem.
U khlieh duh ka District u pyntip ba ka don ka jingbthah na ka Sorkar sha baroh ki tnad treikam/Board/Corporation bad kiwei kiwei, ba kin pyndonkam ïa ka Employment Exchange ba kin jied ne phah ïa ki kyrteng kiba ibit ban pyndap ne thung kam ha ki kam contract kiba lait.
U la ong ba ka rai jong ki bor khmih ban pyndap ïa ki kam kiba lait, da kaba thung contract hapoh ka Ophis ka DSWO West Khasi Hills ka dei kaba ïaid katkum ka jingbthah jong ka Sorkar Jylla.
U la pyntip ba dei halor kane ka nongrim ba ka DSWO ka la thoh sha u Assistant Employment Officer ka WKH, ban phah ïa ki kyrteng jong ki nongwad kam kiba ibit ban trei ha ki kam kiba lait, kiba kynthup ïa 2 tylli ki kam Gender Specialist, kawei ka kam Specialist in Finance Literacy, kawei ka kam Assistant Accountant, kawei ka kam DEO jong ka PMMVY bad kawei ka kam MIS.