Nongpoh, Naiwieng 20: Ki bor pynïaid district jong ka Ri-Bhoi District ryngkat bad ka Jal Jeevan Mission ryngkat ki tnad treikam bapher bapher jong ka sorkar mynta ka sngi kila pynkut noh ïaka jingrakhe ïaka Jal Utsav kaba dei ka prokram ïalap bad pynsngewthuh ïaki paidbah halor ka jingkordor ka um kaba la rakhe mynta la 15 sngi lynter naduh ka 6 tarik Naiwieng 2024.
Ïa katei ka prokram la pynkut noh mynta ka sngi haka jingïalang kaba la long ha Parish Hall Nongpoh, ha kaba u Myntri ka tnad PHE u Marcuise Marak u la wan ban shim bynta kum u kongsan, haka jingdonlang u Abhilash Baranwal, Deputy Commissioner ka Ri Bhoi District, ka Kong B Lyndem, Chief Engineer ka tnad PHE, Shillong, nalor kiwei kiwei ki ophisar jong ki tnad treikam bapher bapher, ki nonghikai bad ki khynnah skul.
U Abhilash Baranwal Deputy Commissioner ka Ri-Bhoi haba kren ha kane ka sngi u la ong ba ka Ri-Bhoi District ka dei kaba la ioh ïa ka jingithuh da ka NITI Aayog kum kawei na ki 20 tylli ki Aspirational District ha ka ri ban rakhe ïa ka Jal Utsav kum ka thong ban pynsngewthuh sha ki paidbah halor ka jingkordor ka um bad ban ïada ïa ki tyllong um ban pyndep ïaka thong jong ka Jal Jeevan Mission ban pynpoi umbam umdih haman ki thliew iing.
U la ong ruh ba kane ka prokram la rakhe kumba 15 sngi lynter da ka ophis u DC, ka tnad PHE lem bad kiwei kiwei ki tnad sorkar bad kane ka prokram kala long kaba jop bad pynmyntoi ïakiba bun tylli ki shnong hapoh ka district ha kaba la ioh ruh ban pynlong ïaki prokram bapher bapher ryngkat ka jingshim bynta shitrhem jong ki khynnah skul, ban rah ïaka khubor halor ka jingkordor ka umbam umdih bad ban sumar ïaka mei mariang bad ki tyllong umdih.
U Myntri ka tnad PHE u Marcuise Marak haba kren ha katei ka sngi kum u kongsan u la ai ka jingïaroh ïaka bor pynïaid district, ka tnad PHE bad kiwei kiwei ki tnad sorkar kiba la snohkti lang ban ïadon bynta ha katei ka jingrakhe ïaka Jal Utsav kaba jop kaba dei ruh ka thong jong u Myntri Rangbah ka ri U Narendra Modi ban sumar bad pynneh pynsah ïaka um.
U la ai ruh ka jingïaroh ïaka jingtreishitom jong ki ophisar haka district kiba la shimkhia ban leit rung sha ki shnong ki thaw ban ïalap paidbah halor ka jingkordor ka um bad kumno ban pynneh pynsah ïaka ryngkat ba ka jingkitbok ba kum ka Aspirational District kan dang kiew shaphrang ban pyntreikam ïaki skhim sorkar bad ki prokram bapher bapher.
Ha katei ka sngi la sam ruh ïaki khusnam sha ki nongjop kiba la shim bynta haki jingïakop bapher bapher ha katei ka jingrakhe ïaka Jal Utsav.
