Shillong, Naiwieng 20 : U President ba thymmai jong ka National People’s Youth Front (NPYF), Bah Wailadmiki Shylla ha ka sngi Balang u la ong ba um ïahap satia bad ka jingong ba ki paidbah ka jylla mynta ki la ngiah shoiñ ïa ka National People’s Party (NPP).
“Dei tang kito kiba kren bad kynthoh kiba pyrshah (ïa ka NPP). Katno ki don te ngi te ngin shim ba kito ki bym kren ki dei kiba shaniah ïa ka NPP,” ong u Bah Wailad haba kren bad ki lad pathai khubor hadien ba u la shimti kum u President thymmai ka NPYF.
Tangba u ong pat ba kim lah ban shu sngap kumto ïa ki jingkynthoh ba ki paidbah ki pynpaw namar ki lah ban long kiba dei bad shongnia ruh. “Kum u samla bad kum u briew uba thrang ban trei, ngin sa leit ban peit markhmat ha kito ki jaka ba don ki jingpyntrei.”
U la ïathuh ruh ba hadien ba ki tnad sorkar ki la dep ban pyllait ïa ki skim bapher bapher ka donkam pat ïa ki kum ki samla ka party ban leit buddien ïoh ba katei ka jingkynthoh jong ki paidbah ka lah ban dei na ka daw ba kam don shisha ia ka jingpyntreikam kaba hok ynda la poi ha ki paidbah.
“Ka sorkar jan ha baroh ki liang ka la pyllait ïa ki skim bad ki song jingïarap. Mynshwa ki nongshna phlim ki nongshna video, ki nongthoh kot kim ju ïoh jingïarap hynrei mynta baroh ki ïoh mynta na ka jingïarap jong ka sorkar. Peit wat ki jaka jngohkai pyrthei ruh ki ïoh jingïarap kumta ki don shibun kiei kiei,” u la bynrap biang.
Kumta, u ong ba hadien ba ki ïohi ïa ka jingud jingkhnium jong ki paidbah ha ki lad pathai khubor, ïa kata pat ki hap ban buddien khnang ban lap ïoh ka don ei ei kaba pynwit ha ka jingpyntrei ïa ki projek bad ki skim ba wan na ka sorkar.
Shuh shuh u ong ruh ba lada dei ba ki paidbah kim shaniah shuh ïa ka party, lehse ka NPP kan ym don mynta 31 ngut ki MLA ban kylla long ka party kaba don bun tam ki nongmihkhmat ha ka jylla.
“Lehse ha kine ki shisngi arsngi ngi lah ba poi haduh 32 ngut da ka jingjop jong ka kyrtong ka party ha ka elekshon shiteng samoi ha Gambegre,” u la bynrap biang.
