Shillong, Naiwieng 19 : Ka sorkar jylla ka la thung da ka Committee na ka bynta ban pynthymmai ïa ki rukom treikam jongka Meghalaya Public Service Commission (MPSC).
ïa kane ka rai la shim hadien ba la ïoh ki jingujor bad jingkynnoh ïa ka jingbym ïaid beit , ïaid ryntih bad jingkynrum kynram ha ki rukom treikam khamtam eh ha ka jingthungkam jongka MPSC.
Haba ïathuh ïa kane ha ki lad pathai khubor u Chief Secretary ka jylla u bah DP Wahlang u la ong “ Ngi la thung ïa ka Committee ban khlieh da u bah F.R Kharkongor ban peit kumno ban wanrah ki jingpynthymmai ha ka jingtreikam jongka MPSC bad la bthah ba kane ka Committee kan shong bad ai ïa ka kaiphod hapoh ka 31 tarik u Kyllalyngkot 2025”.
Ki kyndon treikam jongka Committee ki long ban ai jingmut kumno ban pynbha bad pynthymmai ïa ki rukom treikam jongka MPSC ym tang na ka bynta katto katne por hynrei ki ban ïai treikam lynter.
Hapoh une u snem ka MPSC ka la mad ïa kiba bun ki jingïakhih pyrshah da ki seng bhalang halor ki jingkynnoh ba kam biang ka rukom thungkam thung jam ïa ki samla.Dei halor kine ki nogrim ba la mih ki jingdawa ban pynthymmai lut nadong shadong ïa ki rukom treikam ka MPSC.
Ka Khasi Students’ Union (KSU) ka la ai jingmut ne ai ki jingtyrwa ïa ki Arphew tylli ki mat ban pynthymmai ïa ki rukom treikam ka MPSC khnang ban lait na ki kam leh shilliang khmat bad jingbamsap ha ka jingthung kam thung jam.
Kine ki arphew tylli ki mat jingtyrwa jongka KSU ki kynthup ruh ban thung ïa u ne ka Chairman bad ïa ki dkhot jongka MPSC da kiba ym don jingïadei ha ka kam saiñ pyrthei. Ban pynbna man la u snem ïa ki jingdon jingem jong ki nongtrei sorkar kata naduh u ne ka Chairman ki dkhot bad baroh ki nongtrei kiba trei hapoh ka MPSC, ban thaw ïa ka Vigilance bad Anti Corruption Directorate. Ban thep kam hapoh ka jylla dei ban tip ïa ka ktien Khasi ne Garo ban pynlong da ki competitive Examination ïa ki post kiba ïa ryngkat ka kyrdan bad tulop, ban pynlog ïa ki examin na ka bynta ki post MPS, MCS man la u snem ban buh da ki tarik baroh shisnem ban pynlong ïa ki interview bad ter ter.
Ka KSU ka ai jingmut ba dei ruh an pynbna paidbah ïa ki mark ba ïoh da ki samla kiba ïaleh ïa kino kino ki examin ,ki test ne ne ki interview ba pynïaid da ka Commission. Ym dei ban pynkylla ïa u Roll Number jong kito kiba ïaleh ïa ki eksamin bad bun kiwei kiwei ki mat.
