Sei ka MAWA 104 ngut ban aireng ha ka 4th PAFI National Armwrestling & Para Armwrestling C’ship

SHILLONG, Jymmang 24: Ka Meghalaya Arm Wrestling Association (MAWA) ka la pynkhreh ïa ka kynhun ba aireng ha ka 4th PAFI National Armwrestling & Para Armwrestling Championship kaban long ha Ahmedabad, Gujarat kaban sdang naduh ka 29 tarik Jymmang 2026 haduh ka 01 tarik Jylliew 2026.
Shuwa ba ka kynhun kan mih na nongbah ka la don ka jingïalang kitbok kitrwiang ha ka jingïadon lang u bah Junestar Kharbuli President ha ryngkat ki nongïalam jong ka MAWA bad ki nongïalehkai.
Na ka bynta kane ka lympung ka MAWA ka la pynkhreh ïa ki nongïalehkai ha baroh ki kyrdan kiba kynthup ïa ka Junior, Sub Junior, Senior, Master, Grandmaster bad Para-Athlete.
Ka kynhun ka kynthup ïa 104 ngut ki nongïalehkai, 50 ngut ki shynrang bad 54 ngut ki kynthei, bad yn synran ïa ka kynhun da ki referee bad ki officials kiba don 10 ngut bad baroh kin long 114 ngut.
Na ka liang jong u President ka MAWA, u la ïathuh ba ki District, ki club bad ki gym bapher bapher ki la wan lang ha kajuh ka lama jong ka MAWA ban mihkhmat kum ka jylla sha katei ka lympung, da kaba pynpaw ruh ïa ka jingsngewskhem ba ka kynhun kan lah ban wanrah ïa ka nam ïa ka jylla baroh kawei.
U la pynpaw ïa ka jingkmen ba mynta ka kynti la ïoh ban phah haduh 104 ngut ki nonglehkai sha katei ka rynsan kaba heh, bad u kyrmen ba kine ki nongïalehkai kin poi sha ka World champion level bad kin lah ban ïakhun shuh shuh sha ki kyrdan kiba kham heh.
Na ka liang ki nongpynïaid ki la jied ïa ki kapten kiba don ha ki kyrdan bapher bapher bad kine ki dei bah Kishore Chettri, Alan Sun Marbaniang, Thranghok Dkhar, Roy Mylliem Umlong, Margareth Pathaw, Aiboklin Rina, Bandarika Kharkongor, Airikmenlang Shabong, Banshanlang Terang- para, Shanborlang Siangshai- para bad Suzie Kharnarbi- para.