Sei ka DCIC ïa ki sap barieh jong ki samla, bluit mih ki riam ba iskuiñ jong ki heprit bad ki ryndia dhara

Shillong, Lber 13 : Ki nongwan ban sakhi ïa ka sngi kut jong ka jingpyni nam ïa ki riam ki beit bad ki jingshna ba harukom ba la pynlong da ka ophis u General Manager ka District Commerce & Industries Centre East Khasi Hills ki la kyndit lut ban ïohi ïa ka sap ba rieh ba katei ka ophis ka sei lyngba ki samla kiba ka kyrshan bad plie lad plie lynti.
Ha kane ka sngi kut kaba la pynlong ha Anton Hall Laitumkhrah la pynshongshit da ka jingpyni ïa ki riam kiba itynnad ba la pynwandur da ki nongsuh bad nongthain lyngba ka jingkyrshan jong katei ka ophis.
Kine ki riam ki kynthup naduh ki riam jong ki heprit, jong ki samla katkum ka juk mynta bad ruh ki riam tynrai naduh ki dhara ki ryndia bad ki pla snieh nalor kiwei kiwei.
Ïa kane ka lympung pyni nam ba arsngi la wan ban plie pyrda sa ka Deputy Commissioner ka East Khasi Hills Kong RM Kurbah ha ka sngi Palei ryngkat ka jingdonlang ki ophisar na ka MSME bad na kiwei kiwei nalor ki nongshim bynta na ki 41 kynhun ki nongseng kam lajong.
Na ka liang u General Manager ka DCIC bah Albert Malngiang haba kren bad u Mawphor u la ïathuh bniah shaphang bun ki jingïarap ba ka ophis ka ai na bynta ki khun samla kiba don ka sap bad thrang ban ïeng ha la ki jong ki kjat.
Katba na ka liang ka DC ka la kyntu ïa ki samla ba kim dei satia ban lehrain ban sdang ïa kano kano ka kam hynrei ban mih shakhmat bad shim kabu ïa ki jinghikai pyntbit ba ki ïoh naki tnad sorkar khnang ba kin lah ban pynjanai ïa ka sap ne kano kano ka kam kaba ki don ka jingtbit.
Ha kane ka sngi pynhap pyrda ïa kane ka lympung, ki la don bun ki kynhun kiba wan ban pyni nam ïa ki riam la ka long naduh ka riam ki heprit, ka riam ki samla bad ruh ka riam na bynta ki longkmie kumjuh jong ki samla shynrang.
Katto katne na ki kynhun kiba sei ban pyni paidbah ïa ki riam jong ki ki kynthup ïa ka MK Embroidery, Mawlai Nonglum, nangta ka Auxilium Life skill training centre, Nongthymmai, ka Ewanri Tailoring & Embroidery, Mawlai Nongpdeng, na ka Daphira Fashion Studio, Lower Lumparing, na ka Faron leather craft, New colony, Laitumkhrah, na ka NELA Handloom Training cum Production centre, Mawkasiang bad kumjuh na ka Women for Integrated Sustainable Empowerment, Laitumkhrah.
Ha kane ka iew pyni nam ki la don ruh shibun ki tiar ki tar, ki jait jingbam, ki jingshna na ki thri, ki nongdro ba pawnam, ki juti, ki syntiew ba shu shna na ki dieng, bad kiwei kiwei.