Sei ka Congress da u kyrtong ba wan baar ha ka election MLA 2018 na ka North Shillong Constituency

7 tarik yn pynïasoh u Bah J.A Lyngdoh sha ka Party

0

Shillong, Risaw 5 : Hadien ba ka Congress ka la sngap jar namar ba u kyrtong uba ka thmu ban pynïakhun u bah M.Kharkrang u la leit pynïasoh noh sha ka BJP, mynta ka la ïoh pat ban sei da u kyrtong uba wan ba ar ha ka Election MLA 2018 uba ïakhun na ka party BJP hi ha katei ka election u bah J.A Lyngdoh ban ïa ai reng na ka North Shillong Constituency.
U bah J.A Lyngdoh un pyniasoh noh sha ka Congress ha kas 7 tarik ha ka por janmiet ha Congress Bhavan, ïathuh u General Secretary ka MPCC u Sanjay Das ha u nongthoh khubor.
Haba ïakren bad u Mawphor u Sanjay Das u la ïathuh “Ka Congress ka la dep ïakren ïa pynbeit ban ai ïa ka tiket sha u bah J.A Lyngdoh bad ka jingpynrung dkhot ïa u ruh kan long ha katei ka 7 tarik.U bah J.A Lyngdoh un pynïasoh bad ka Congress ryngkat ki nongbud jongu na ka party BJP”.
Ha ka jingshisha u bah J.A Lyngdoh ula long uwei na ki nongïalam jong ka BJP ha ka jylla bad ha u 2018 u la ïakhun ruh na ka Tiket BJP na kane ka North Shillong Constituency bad u la rem tang khyndiat vote eh namar u la wan ba ar bad ïoh haduh 5160 vote. Hynrei hadien kane ki nongïalam ka BJP ki la leh klet noh ïa u ha kiba bun ki kam jongka party kumta um banse ban mih noh na ka BJP bad mynta u la rai ban pynïasoh noh sha ka Congress.
Lah ban pynkynmaw ba u bah J.A Lyngdoh u la jop nyngkong eh kum u MDC ka Mawphlang Diengiei Constituency bad hadien kane u la jop kum u MLA na ka UDP na ka Nongspung Constituency bad long ruh kum u myntri sorkar ha kane ka jylla. Kumta u dei uwei na ki nongïalam bad u nongsaiñ pyrthei uba la iar bha ka jingmut jingpyrkhat.

Leave A Reply

Your email address will not be published.