Ranikor, Risaw 24: Ka Indian National Congress (INC) mynta ka kynti kum ka jingpynkhreh na ka bynta ka elekshon jong u snem 2023 ha ka jingïalang jong ka Ranikor Block Congress Committee kaba la long ha ka 24 tarik u Risaw, 2022 da kawei ka jingmut ka la rai ban pynïeng ïa ka kong Victorealness Syiemlieh kum ka kyrtong jong ka Congress na 35 Ranikor (ST) Assembly Constituency.
Ka Kong Victorealness Syiemlieh ka dei na ka shnong Rangthong, South West Khasi Hills District kawei ka shnong kaba heh ha ka Constituency, ka dei ruh kaba la bit la biang ha ka pule puthi, ka briew kaba ju ïakit bha ha ka imlang sahlang ha ka shnong ka thaw bad ka dong ka thaiñ. I Kong Victorealness ba ju khot ieit i Kong Vic, i la shakri kum ka Nurse ha Mawkyrwat, Rangthong, Nongstoiñ bad i la shongthait kum ka Assistant Director of Nursing, DHS jong ka sorkar jylla.
I Kong Victorealness i dei ruh kaba ju shakri bha ïa ki kam Balang ha kaba i la bat bun ki kam ha ka Balang, nangta ha ka District, Presbytery bad i la ju bat ruh kum ka General Secretary ka Jingïaseng Kynthei KJP Synod Sepngi bad mynta i bat kum ka Treasurer jong ka Jingïaseng Kynthei KJP Assembly.
