Da ka jingïalang bah yn pynlong ki nongshet ja sngi haka 31 tarik u Risaw ha Shillong

By Mawphor News Desk On Oct 25, 2022

Jowai, Risaw 25: Ki nongshet ja sngi ‘PM Poshan (MDM)’ hapoh ka jylla Meghalaya kiba la don kumba 18,776 ngut baroh, mynta ka sngi kila pynban paidbah ba kin pynlong ïa ka jingïalang bah ne ka rally ha madan Fire Brigade ïew Rynghep Laitumkhrah, Shillong, ka ban long haka 31 tarik u Risaw, 2022 naduh ka por 10 baje mynstep.
Ïa kane la pynbna mynta ka sngi da u President ka All Jaiñtia Mid Day Meal Worker Union, Jowai ma Jerry Suting hadien ka jingïalang jong ki nongshet ja sngi hapoh ka lama ka All Jaiñtia Mid Day Meal Worker Union Jowai (AJMDM-WU) West Jaiñtia Hills kaba la long ha Dorbar Hall ka Tpep-Pale Jowai.
Ka seng kala shim ïa kane rai ban pynlong ka jingïalang bah ha ryngkat ka jingrah lang ïa ki pla card ha nongbah Shillong ha ka 31 tarik u Risaw, ka long halor ka nongrim ba ka sorkar kam shem la pyntreikam ïa ka jingkular hadien ba la dep ïakut bad ki nongïalam ka seng dang ha kine ki kyndiat bnai.
Kumba long haduh mynta ka sorkar ka kmie kala siew pisa haduh 90 percent, katba ka sorkar jylla ka long tang 10 percent 100 tyngka lada kheiñ lang ka long tang 1000 tyngka ha ka shibnai, halor kane ka AJMDMWU ka dawa jur na ka sorkar jylla lyngba u Myntri Rangbah ba kan ïarap katba lah ban pynkiew noh ïa kane ka share na baroh ar ki sorkar jong jylla bad sorkar kmie.
Shuh shuh na ka liang jong kitei ki nongshet ja sngi ‘PM Poshan’ kila pynpaw ïa ki jingeh kaba khraw haka liang ban pyndap pynbiang ïa ki khun ki kti, naduh ka bai skul, bai uniphom, ka bai kot bai kopi bad kiwei de ki jingdonkam jong ki khun jong ki kti.
Hynrei lada kheiñ ïa ka bai nong kum ka jingsiew ba ai sngewbha ‘Honorarium’ ka long tang T.1000/- shi bnai kaba shongdor tang 30 shi sngi bad ka jingsiew ka long tang 10 bnai haka shisnem ïa kane ruh kila dawa ban dei ban siew noh 12 bnai ha ka shisnem namar ha u bnai December ka don shibun ki jingdawa ban pynkhreh ïa ka Christmas.
Na ka liang u Adviser ka seng ma Khroo L. Pariat, ‘All Jaiñtia Mid Day Meal Workers Union’ (AJMDMWU) ula pynkynmaw ba ka seng kala dep ban pynsngew ïa kine ki jingeh sha ka sorkar hynrei kim shem la urlong satia, kumta u khot ïa baroh ki nongshet ja sngi ba kin pynlong beit da ka jingïalang bah jong baroh ki nongshet ja sngi hapoh ka jylla ban wan ïashim bynta lang ha katei ka sngi, da kaba u ong ruh ba kane ka long ka jingsdang bad ka sien kaba khadduh ban shah ïa kine ki jingkular kiba khlem seisoh jong ka sokar.
Ha ka juh ka por ula dawa na ka sorkar kumjuh ba ka dei ban buh noh da ki tyndong shet jingshet LPG ha ki kamra shet jong ki skul hapoh ka PM Poshan, khnang ban lait na ka jingpyndonkam da ki dieng (dpei) kaba ktah ïa ka koit ka khiah bad ïa ka mariang kumjuh.
U ma Pariat ula buh ka jingkyntu ïa u Myntri Rangbah ba un shim khia ïa kane ka jingeh jong ki nongshet ja sngi ïa ki khynnah skul hapoh ka jylla, da kaba pynsngew naduh u bnai July, August bad September mynta u snem ka sorkar kam pat dep ban siew ïa ka bai nong kaba 1000 tyngka shibnai. na ka liang jong u ula kren shai ba lada ka sorkar kam lah ban leh eiei kala dei ban pynduh pyndam nong shi shyndon ïa kane ka PM Poshan napoh ka jylla.