Jied ïa u Dasakhiat phin ïoh 2 ngut ki MLA nga ruh ngan long kum u MLA jongphi : Ngaitlang

Shillong, Risaw 24 : U MLA barim ka Umroi ba dei ruh u kpa jong u Dasakhiat Lamare, Bah Ngaitlang Dhar ha ka sngi Nyngkong u la kyntu ïa ki paid Nongkrem ba lada ki jied bad pynjop ïa u khun jong u ha u 2023, katei ka constituency kan sa ïoh arngut ki MLA.
“Lada phi jied ïa u (khun) kum u MLA jongphi, nga pat ngan long kum u MLA ba-ar u ban kit bad bah lang ïa ka jingdonkam ki paidbah ka constituency,” ong u Bah Ngaitlang ha ka jingïalang pynskhem ïa ki nongkitkam ba thymmai jong ka NPP Nongkrem Block kaba long ruh ka jingïalang pynithuh paidbah ïa u Bah Dasakhiat kum u kyrtong ka party na katei ka constituency.
U Bah Ngaitlang u la ong ruh ba lada ki paidbah ki pynjop MLA ïa u khun jong u lada kim ïoh ban ïa kynduh ïa u MLA namar ka jingbunkam jong u, u shim ïa ka jingkitkhlieh ban tynrong lang ïa ka jingtreikam kum u MLA uba ar ha ka jaka jong u lada ki paidbah ki donkam ka jingïarap ne haba ki kynduh ïa kano kano ka jingeh.
Shuh shuh u la ïathuh ruh ba hadien ba u la sdang ban ai jingïarap sha ki paidbah jong katei ka constituency ki la mih pynban ki jingpyrshang ban pynthohbria da kaba kynnoh ba ka ïing ka sem jong ki, ka thmu ban leit thied ïa ki paidbah kumba la kynnoh da ki kyrtong.
“Ka jingjied jongngi ïa ka Nongkrem kadei hadien ka jingïasyllok bad bun ki nongïalam na kane ka constituency kiba la pynpaw ïa ki jingeh ba ki ïa kynduh haduh ba la pynlong ïa ka ïing jong ki ban mih shakhmat bad ïarap katba ki lah ei,” u la ong.