Sei bad ki jingshisha ne ujor sha ki bor ka aiñ lada phi lap ba bamsap ka sorkar MDA ther u ma Sniaw ïa ka VPP

Shillong, Lber 18 : U Symbud Myntri Rangbah ka jylla uba long ruh u National General Secretary ka NPP u ma Sniawbhalang Dhar u la ther tyngeh mynta ka sngi ïa ka Voice of the People Party (VPP) kaba la shu kynnoh khlem nongrim ïa ka sorkar MDA ba ka dei kaba bamsap.
U la ong “ Lada phi (VPP) kynnoh bamsap ïa ka sorkar MDA sei bad ki jingpynshisha ne ujor sha ki bor ka aiñ la ka dei sha ki bor pulit ne sha ki ïing Bishar wat ju kynnoh khlem nongrim tang ban pynbiej bad pynthame ïa kiba pli ki paidbah khamtam ïa ki paid nongkyndong”
U ma Sniawbha u la ong “ Ha kiba bun ki khep ki nongïalam ka VPP kim ju pyrkhat shwa ba kin kren ki shu kren kat shaba lap ba shem na kata ka daw kiba bun ki paidbah ki kynnoh ba ka dei ka party ïew . Ki kynnoh ba kane ka sorkar MDA kaba bamsap hynrei ki klet ïa lade ba ki pynap da ki borti ban khrong pisa na ki paidbah ïa kaba ym pat ju don party kiba leh kumtei”.
Nalor kata u la ong “ Mano ba pynhikai bamsap ïa ki paidbah hato ym dei u nongïalam ka VPP hi u bah Ardent Basaiawmoit , namar na ka por sha ka por u hikai ïaki paidbah ba ki dei ban shim beit ïa ka pisa tangba kim dei pat ban vote hato kane kam dei ka jinghikai bamsap ïaki paidbah? Kam dei ba u ïalam bakla ïa ki paidbah bad pynshlur ïa ki kam bamsap? Haba kumne mano ba pynshlur bamsap ka VPP ne ka sorkar?”
Kumta u laong ba kam dei satia kat kaba kren u bah Ardent ka long kaba dei namar ka sorkar ruh ka trei na ka bynta ka roi ka par, ka ïoh ka kot bad ka ïoh kam ïoh jam ki samla.
U ma Sniawbha u la ong shuh shuh “Namar ba ka sorkar ka wanrah ïa ka roi ka par wat lada hap ban shim da ka ram ruh kane kam mut ba ka sorkar ka bamsap. Nga la ju ïohsngew na ka por sha ka por ba ki kynnoh bamsap ïa ka sorkar lada ki lap ïakita ki kam bamsap ai da ka jingthoh ne pynshisha da kaba kiew sha ïing lieh ïing saw ruh kam pher hynrei ym dei ban shu kynnoh mata madei khlem nongrim”.