Shillong, Lber 18: Ka seng North East Students’ Organization (NESO) ha ka sngi Nyngkong ka la mudui da ka mukotduma ka jingkyrpad hakhmat ka ïingbishar ba halor duh ka ri ka Supreme Court ka ri India ba pynsangeh ïa ka jingpyntreikam ïa ki kyndon jong ka Citizenship (Amendment) Act, 2019.
Ha ka jingthoh na ka liang u Chairman jong ka NESO u Bah Samuel Jyrwa u la ong, “Ngi la phah ïa ka jingkyrpad sha ka Supreme Court, ba kan tuklar lem ha kaba ïadei bad ki kyndon jong ka Citizenship (Amendment) Act, 2019 bad da kaba kyrpad ruh ïa ka Supreme Court ban pynmih ïa ka hukum ban pynsangeh ïa ka jingpyntreikam ïa kane ka aiñ.”
Kham ha shwa na ka liang ka NESO ka la phah da ka jingkyrpad sha ka Supreme Court ha ka 19 tarik u Nohprah, 2019 pyrshah ïa ka jingpyntreikam ïa ka aiñ CAA, 2019.
“Watla ba ka CAA 2019 ka la pynlait ïa ki jylla kiba don ïa ka ILP kiba kynthup ïa ka jylla Mizoram, Nagaland, Arunachal Pradesh bad Manipur bad kumjuh ruh ïa ki jaka kiba hab hapoh ka jingpyntreikam ïa ka khyrnit kaba 6 kiba kynthup ïa kumba 98% jong ka jylla Meghalaya, 70% ïa ka Tripura bad kumba 8 tylli ki district jong ka jylla Assam hynrei ïa ki 27 tylli ki district jong ka Assam ki khlem da la shah pynlait na kane ka aiñ, kaba long ka jingma ïa baroh ki jylla ka thaiñ shatei lammihngi, ha kaba khatduh kan ktah ïa ka lawei,” u la ong.
“Kumta ban ïada ïa ki trai ri trai muluk bad ki rit paid jong ka thaiñ shatei lammihngi kiba la shah dep shah ktah da ka jingwan rung ki mynder ri na ri Bangladesh,” ong u Bah Jyrwa. U la ong ba ka long kaba kongsan ba ïa ka CAA, 2019 ym dei ban pyntreikam naba kane kan nang pynsniew dur ïa ki jingbym shngaiñ ka jinglong jingman jong ka thaiñ shatei lammingi.
