Shillong, Lber 18 : Ki kyrtong na ki party bapher bapher kiba thmu ban aireng ha kane ka elekshon MP ka ban sa long shen ha ka 19tarik u Iaiong mynta u snem, ha ka sngi Nyngkong ki la ïoh ban mih rynsan ha ka Sympossium ba la pynlong da ka Sankardev College kyrpang na bynta kitei ki kyrtong ba la tip kum ka Sympossium on Parliamentary Politics and Political Participation.
Ha kane ka rynsan, ki kyrtong kiba wan ban pynshai paidbah ki kynthup naduh u kyrtong ka Voice of the People Party Dr. RJ Syngkong, kyrtong ka UDP Bah Robertjune Kharjahrin, bad kyrtong shimet Prof Lakhon Kma. Na ka Congress pat lawan ban mihkhmat da u Bah Manuel Badwar bad na ka BJP da u Nongai ktien ka Party, Bah MH Kharkrang. Katba na ka NPP ym shym la don ba wan ban mihkhmat.
Shwa ban sdang, la ïoh shwa ïa ka jingkren maitphang na ka Principal Dr. Eureka Lyngdoh bad ruh na u IOAC Coordinator Bah MS Warjri.
Ka jingïatai ka la long kaba shongshit bha khamtam hadien ba la ailad ruh ïa ki samla pule bad ki paidbah ban kylli jingkylli ïa ki kyrtong.
Ha ka jingkren kyllum kaba la ai por mar 10 minit, u nongkren nyngkong, Prof Lakhon Kma u la ong ba ki 7 tylli ki distrik jongka jylla kin sa jied tang uwei u nongmihkhmat ban leit sha Lok Sabha. Kumta u la ong ba lada ki paidbah ki jied ïa u, marwei un ïeng laitluid ban pynsawa ïa ki dawbah jong ka Jaidbynriew ha Parliament.
“Na ki 16 sien ki MP sha Lok Sabha, haduh 6 sien dei ki kyrtong shimet bad u MP ba nyngkong eh ba ngi phah ruh dei u kyrtong shimet,” u la ong da kaba pynskhem ïa ka nongrim kaba u mih bad ïeng ban aireng ha kane ka elekshon kum u kyrtong shimet.
Shuh shuh u ong ruh ba kum u kpa jong ki khun ba dang rit u don ka jingsngewkhia na ka bynta ka lawei jong ki khun ha ka ïohkam ïohjam khamtam eh haba ka jylla mynta ka don ha ka kyrdan kaba ar ne balai na kaba khatduh. “Dei na kane ka daw kaba pynlong ïanga ban shim ïa ka sienjam da ka thong kaba hakhmat eh ban ïakhun ïa ka bamsap bad ruh na ka bynta ban ïakhun ïa kine ki jingeh.”
Haba bynrap lang, u Dr. AJ Syngkon haba kren halor ka koit ka khiah u la ong ba donkam ban pynkhlaiñ ïa ka rukom sumar tynrai. U ong ruh ba kum ka party ka phaikhmat bad kwah ban kyntiew ïa kane ka rukom sumar kaba ki 170 tylli kiwei pat ki ri ki phaikhmat kum kawei naki lad ai jingsumar.
“Hangne ngi don bun bha ki stad dawai tynrai, kumta lada kyntiew bad plie lad ïa ki kan long ruh kum shi bynta ban pynneh ïa ki khlaw ki btap bad ki dawai kynbat,” u la ong.
Ha kajuh ka por u la ong ba kwah ban pynshlur ïa ki samla ba kin sngewthuh ba kano kano ka kam ka dei kaba donburom bad ruh ban trei shitom.
U Bah Manuel ba mihkhmat ha jaka jong u MP ba mynta, Bah Vincent H Pala u la ong ba kane ka juk ka dei kaba jur bha ka jingïakdew kti da kaba pynïapher hapdeng kawei ka jaitbynreiw bad kawei pat kum hapdeng Khasi ne Garo, Hindu ne Muslim bad kiwei kiwei.
Une u rangbah u la kren ruh bun bha halor ka phang kaba ïadei bad ka lawei ki samla ha ka ïohkam ïohjam, nangta ka bylla sngi na ka bynta kito ki bym dei ha ki kam sorkar bad ruh halor bun kiwei kiwei kip hang kiba ïadei bad ka jingkyrshan ïa ki nongseng kam lajong.
Na ka liang u Bah Robertjune Kharjahrin pat ula ong ba ka mat kaba hakhmat lada kum u kyrtong ka RDA u jop ka long ban pynbor ïa ka sorkar NDA ban pyntreikam ïa ka Inner Line Permit, nangta ban ïakhun ïa ka hok ban ïoh mane Blei laitluid ha kano kano ka sngi, ban ïakhun pynrung noh ïa ka ktien Khasi ha ka Khyrnit kaba Phra bad khamtam eh ïaka ishu pynbeit pud la ka long bad ka sorkar Assam bad kumjuh bad ka Bangladesh.
“Ngin pynkhlaiñ ïa ka Sixth Schedule bad ngi pyrshah ïa kito kiba kwah ban pynduhnoh ïa ka,”u la ong.
Ha kajuh ka por u la ong ruh ba ki don bun ki samla ba la nang la stad bad pyndep ki jingpule hynrei kim don pat ka lad ban sengkam lajong kumta u ong ba kane ruh ka dei shi bynta jongka mat jong ka RDA ha kane ka elekshon.
U la kren ruh halor ka jingeh jong ki nongrep khamtam halor ka jingnang hiar ka dor ki mar rep kiba pynmih na khlaw kum u synsar, latyrpad bad kiwei kiwei.
U banjur ruh ïa ka jingdonkam ban pynbiang ïa ki jaka sumar khnang ba ki paidbah kin ym donkam shuh ban leit shaduh Assam ne shabar jylla ban phah sumar.
Katba u Bah MH Kharkrang u la ong ba naduh ba shimti ka BJP ïa ka sorpdeng ka la pyrshang ban pynkylla thymmai lut ïa ka rukom treikam. U la kob ruh ba ka party jong u kam don jingartatien ban wan biang ha ka bor ha kane ka elekshon ban wan.
“Hato phi kwah ba u MP jongphi un don ha ka liang synshar ne liang pyrshah. Kum u nongïalam ka BJP ha ka jylla ngi kwah ba u MP ka party lada u jop un trei bha,” u la ong da kaba ïathuh ruh ba ka party ka la pynduh tiket ïa kumba 30 ngut ki MP tang na ka daw ba ka lap ba kim treikam.
