Kam pher lada phi don ha kano kano ka party ïeng tylli kyrshan ïa ka Congress ban ïoh synshar ha Delhi : Pala

Shillong, Lber 18 : U Nongïalam ka Congress bad MP na ka Shillong Parliamentary Constituency bad uba long biang ruh u kyrtong jongka Congress u ban ïa aireng biang ha kane ka kynti u la kyntu ïa ki paidbah kiba ju kyrshan ïa kiwei ki seng saiñ pyrthei ba kin ïatylli ha kane ka kynti bad kyrshan ïa ka Congress ha kane ka election Lok Sabha ka ban long ha ka 19 tarik Iaiong khnang ba kan ïoh ban synshar biang ha Delhi.
ïa kane u la kren ha ki jingïalang paidbah ha Malangkona, Athiabari West Khasi Hills ha ka 16 tarik mynta u bnai. Haba kren ha kitei ki jingïalang u ma Pala u la ong “ Kam pher la phi don ha ka NPP, TMC, UDP, HSPDP ne VPP hynrei to ngin ïatylli lang bad kyrshan ïa ka Congress namar ha Delhi dei tang ka Congress lane ka BJP ki ban thaw ïa ka sorkar ba thymmai”.
U la ong lada ka Congress ka khlaiñ ka mut ka jaidbynriew bad imlang sahlang ruh ka khlaiñ.
Namar u la ong kumba long mynta ka jingsynshar ka la noh shilliang palat. “ Kiba riewspah ki la nang riewspah, kiba duk ki la nang duk, kiba don ha ka bor ki la nang kiew spah. Ki dor ki mar rep naduh u tympew bad kiwei kiwei ki la nang hiar namar la ailad ïa ki kwai ban wanrah na kiwei ki jylla sha kane ka jylla. Na kata ka daw kano kano kaba kit ba bah ha surok kin dawa pisa bad lada siew pisa kaba long beaiñ ka long kat kum ka aiñ bad yn ym don ba pynthut shuh hi ruh. Ka jingsynshar kane ka sorkar ka la noh shilliang palat bad suki pa suki kane ka jingeh kan nang khraw bad ki ban mad jingeh lei lei kin dei ki khun samla”.