Nongstoiñ, Lber 18: Namar ka election sha ka Lok Sabha, 2024, ka Election Commission ka Ri India ka la pyntrekam ïa ka model code of conduct naduh ka 16 tarik u Lber 2024, khnang ba kane ka election kan ïaid beit ïaid ryntih khlem kano kano ka jingpynthut.
Katkum ka bor kaba la pynkup hapoh ki kyndon 144 Crpc, u District Election Officer West Khasi Hills District Bah Garod L.S.N Dykes IAS, u la pynmih hukum ban mana pyrshah ïa baroh ki seng saiñ pyrthei, kumjuh ruh ïa ki nongkyrshan ba kin bud ryntih ïa kine ki jingbthah khang ban lait na ki kyndon jong ka aiñ.
Ha kaba ïadei bad ki lad pathai khubor, la ki dei ban pynmih advertisement, ki jingkyrpad, ki jingrwai, ki lama, ki flex, ki poster bad kiwei kiwei kiba ïadei bad kane ka Lok Sabha Election, dei ban da ïoh jingbit shuwa na ka Media Certification and Monitoring Committee kaba don ha ka ophis u District Election Officer West Khasi Hills, District.
La ai por shiphew sngi ïa kiba don ïa ki suloi license ba kin wan buh ne aiti ha ki police station kiba hajan eh jong ki lait noh ïa ki bor pulit bad ki bor shipai. Ka jingrah pisa kam dei ban palat ïa ka 50 hajar tyngka bad lada ki donkam ban rah palat ïa kata, ki dei ban da buh da ka jingthoh khnang ban lait na ka jingshah kem.
Ka jingpyndonkam ïa ki tynghung pynsawa ha ki jingïalang paidbah kam dei ban palat ïa ka 6 baje mynstep haduh ka por 10 baje mynmiet. Ym bit ban pyndonkam da ki kali kiba khlem ïoh jingbit ha ka por ba pynlong jingïalang ne jingïaid paidbah. Ym shah ban thoh ïa ki poster, ki kot lyngkdop, ki banner ki lama bad kiwei kiwei khlem da ïoh jingbit.
La khang ban ïalap elekshon hapoh 100 meter na ki Polling station. Ym shah ban pyndonkam ïa ki ktien khlem akor ha ka por ba ïalap elekshon paidbah ne jingïaid paidbah. Ym bit ban pyndonkam ïa ki lad pathai khubor, la ki dei ki kot khubor, ne lyngba ki tv, radio, mobile, ki SMS, kum ki lad ban ïalap elekshon khlem da ïoh shuwa ïa ka jingbit.
Nangta u District Election Officer, u la pynbna sngi tyrkhong kyiad ha baroh kawei ka distrik naduh ka 4 baje janmied jong ka 17 tarik u Ïaiong 2024 haduh ka 4 baje janmiet jong ka 19 tarik Ïaiong 2024 bad ruh naduh ka 7 baje janmiet jong ka 3 tarik u Jylliew 2024 haduh ka 7 baje janmiet jong ka 4 tarik Jylliew 2024.
Mairang: U District Election Officer jong ka Eastern West Khasi Hills District Mairang, u la pyntip paidbah ba namar ka jingpynbna da ka ECI ïa ka Election Lok Sabha, 2024, ka Model Code of Conduct ka la treikam ha baroh kawei ka Ri India. Kumta ka ophis ka la buh ïa ka Call Centre ka ban treikam 24 kynta lane 24×7 ha control room DC office, Mairang. Kino kino ki briew kiba kwah jingtip lane kiba kwah ban ujor ki lah ban phone ha kine ki number 1950 (Toll Free) bad 7629065843.
