Sdang tohkit ki pulit halor ka bamsap ïa ka jingshna ïa ka surok Shillong-Nongstoin-Rongjeng-Tura ba 2366.77 klur

0

Shillong, Risaw 22 : Ki pulit ka jylla ki la sdang ban tohkit halor ka jingkynnoh bamsap kaba da ki spah klur tyngka na ka jingshna ïa ka surok Shillong-Nongstoin-Rongjeng -Tura kaba la donkti da ki Kontraktor (kompani) bad ki Engineer ka PWD kaba long 2366.77 klur tynkga.
“ Ngi la rejister ïa ka case bad ngi la sdang ïa ka jingtohkit. Kumta ngim pat lah ban ong ei ei ïa mynta hi” ong u heh pulit haba ïakren bad ki nongthoh khubor mynta ka Sngi Ba Ar.
9 ngut ki briew kynthup ïa ki Ophisar bad Engineers heh kyrdan jong ka PWD ki la paw kyrteng ryngkat bad ki ar tylli ki kompani kawei kaba na Telangana bad kawei na Haryana ki la paw kyrteng ha ka Ejahar ba la ujor da ka sorkar.
Une u heh pulit u la ïathuh ba ym pat kem ïano ïano ruh kat haduh mynta “ Namar ngi dang tohkit bniah shwa ïa kane ka kam. Ngi dang bishar bniah ïa ki kot ki sla ruh ha kajuh ka por” ong u heh pulit.
Namar ba bun ki kynrum kynram bad ki jingbym biang ha kaba shna ïa kane ka surok kumta ka sorkar kam banse ban ujor da ka FIR namar ka pisa ba la mang ban shna ïa ka surok ka la kot shaduh palat 2,300 klur tyngka” ong uwei u heh ka tnad PWD.
ïa kane ka surok kaba pynïasoh ïa ka nongbah Shillong bad ka nongbah Tura lyngba ka Nongstoin bad Rongjeng la pyntrei ha u snem 2010 lyngba ka Special Road Development Programme -North East na ka sorkar pdeng.
Ha kaba sdang ka jingmang ban pynlut ha kaba shna ïa kane ka surok ka long 1303.83 klur tyngka hynrei hadieng ba la pynthymmai biang ïa ka dor ka la kot sha ka 2366.77 klur tyngka. La buh ban pyndep ïa ka surok ha u 2014 hynrei dang lah ban pyndep haduh u 2017. Na kiba paw kyrteng ha ka FIR ki long ki ar tylli ki kompani, u Chief Engineer ba rim ka PWD, Executive Engineer bad kiwei kiwei ki ophisar. ïa kane ka FIR la ujor da u Chief Engineer PWD (NH) u bah AM Kharmawphlang uba la ïoh jingtip kaba thikna na ka jingïaleh mukotduma (Arbitration) ba la pynlong da ka Arbitral Tribunal.
ïa kane ka jingïaleh mukotduma la ujor da kitei ki kompani hadien ba ka tnad PWD kam pdiang shuh ïa ka jingdawa ki kompani ban pynthymmai bad pynheh biang ïa ka dor.
“ Ki Ophisar, ki Engineers da ka jingïasuh buit sop sop bad ki kompani ki la leh ïaki kam thok, kam bamsap kaba la ktah jur ïa ka pisa u paidbah” ong ka FIR.
Kumta ïa kane ka jingïasuh buit bad jingïabamsap dei ban sei madan da ka jingtohkit ba bniah jong ki pulit.
Ha ka FIR la pynpaw baha u snem 2010 ka tnad Ministry of Road Transport and Highways (MoRTH) ka la khot tender ban shna ïa ka surok ban ïaid ar ki kali ne (ka 2 lanning road) jongka Shillong-Nongstoin Section kaba dei ha ka NH 44 bad ka Nonstoin-Rongjeng-Tura. ïa ka tender la khot kat kum ka Special Road Development Programme-NE (SARDP-NE) jongka sorkar pdeng.
Ka tnad PWD ka pyntreikam ïa kane ka projek na ka bynta ka MoRTH. Kumta kiba la ïoh ïa ka kontrak ki dei ka kompani M/s BSC bad ka C&JV ha ka jingmang pisa kaba 1303,83,45,181 klur tyngka. Kumta la ïasoi ïa ka kontrak da u Chief Engineer (NH) ka PWD u bah M Phanbuh kat kum ka shithi 16.5.2016 kum kata ka Joint Venture ha ka 21 tarik Risaw 2011.
ïa ka dor jong kane ka surok la pynthymmai na ka por sha ka por bad ka la kot shaduh ka 2366.77 klur tyngka bad la pyndep ïaka jingshna ïa ka surok ha ka 15 tarik Nohprah 2017 katba ka jingïakut ha kaba sdang ka long ban pyndep hapoh ka 16 tarik u Lber 2014.
Kine ki kompani kat kum ka shithi 23 tarik Iaiong 2015 ki la kwah ban thung da ka Dispute Review Expert (Board) -1 kat kum ka Clause 24 jongka General Conditions of Contract (GCC) bad ki la ai jingkheiñ ban siew tam ïa ki sa 41,89,30,688 klur tyngka na ka daw ka jingkiew dor ka bitumen, ka bai bylla, ka sut na kajingpynslem ban siew ïa ka bill bad kumjuh ruh ka bai ïaleh mukotduma.
U bah Phanbuh Chief Engineer PWD (NH) ha kato ka por u la thoh shithi sha ka Dispute Resolution Board ha ka 16 tarik u bnai Jymmang 2016 bad kyntait ïa baroh ki jingkam jong ki kompani kynthup ïa ka sut bad u la kdew shai ba ki dei ban ïoh tang ka pisa kaba la ïakut kat kum ka jingïasoi ïa ka kontrak.
Na ka liang ka Dispute Resolution Board (DRB)-I ha ka 25.9.2026 ka la bthah ban siew 5,69,00,928 na ka bynta ka rong surok ne ka Bitumen, 16,75,39,464 klur na ka bynta ka labour cess bad 58,91,16,450 na ka bynta ka sut ba pynslem siew ïa ka bill.
Ka sorkar lyngba u Chief Engineer ka la pyrshah ïa kane ka jingai jingkheiñ ban siew kat kum ka shithi 16.5 2016. Hynrei ynda la shimti Chief Engineer da u MR Sangma u la pynkylla khongpong namar kat kum ka shithi 12.9.2016 ba la thoh sha ka DRB-1 u la pynpaw ba ma u kum u Chief Engineer u la pynshisha halor katei ka jingbym pat siew ïa ka pisa na ka bynta ka rong surok ne Bitumen ba la pyndonkam ha DBM bad BC bad kumjuh ruh ïa ka jingkhlem siew ïa ka Labour Cess ba la ot na ki kompani bad kumjuh ruh ïa katei ka sut ba pynslem siew ïa ka bill.

Leave A Reply

Your email address will not be published.